Opozita nuk po përcaktohet dot për protestën e ardhshme

Ramush Haradinaj dy ditë më parë tha se protesta e ardhshme e opozitës, do të mbahet gjatë kësaj jave, por megjithatë kjo ka pak gjasa të ndodhë. Opozita ka pësuar çarje në unitetin e saj, dhe duket se po e ka të vështirë ta rikuperojë atë.

Muharrem Nitaj, zëdhënës i AAK-së, ka thënë për lajmi.net, se caktimi i datës së protestës do të diskutohet gjatë kësaj jave, dhe nuk përjashtohet që ajo të mbahet këtë javë ose shpejtë pas kësaj jave.

“Caktimi i datës së protestës së radhës do të diskutohet këtë javë. Kjo nuk e përjashton mundësinë që ajo të mbahet këtë javë apo shumë shpejt pas saj. Por deri në këtë moment nuk ka një vendim për datën e saktë se kur do të mbahet”.

Ndërsa, në Vetëvendosje nuk preferojnë të japin shumë detaje rreth protestës së ardhshme.

“Jemi në fazën e diskutimeve, por ende nuk e kemi vendosur datën e mbajtjes së protestës”, ka thënë për lajmi.net, zëdhënësi i VV-së, Adonis Tahiri.

Opozita kishte planifikuar protestë për të shtunën e kaluar, por ajo u anulua vetëm një ditë para mbajtjes së saj, shkaku i mospajtimeve brenda partive opozitare.

Para dhe pas këtij vendimi, në mes të partive opozitare është vërejtur një klimë ndarëse, sidomos në mes të AAK-së dhe Vetëvendosjes.