Opozita në Gjilan të ashpër me Kurtin: Jo vetëm të harruar, por edhe të nënçmuar

Gjilan – Sokol Haziri nga Grupi Qytetar për Vetëqeverisje në Gjilan thotë se nuk ka shprehje tjetër, pos mashtrim e nënçmim të qytetarëve, dështim total i pushtetit aktual dhe tentim për mes premtimeve (mashtrimit) për të përfituar rishtas votat e Anamoravasve. Kaluan gati tri vite duke mos ndodhë asgjë e prekshme, në planin investiv në këto anë thotë ai.

Sokol Haziri për rajonipress tha se hambar për vota njihet Anamorava, për çdo palë zgjedhje.

“Premtime plot e asgjë nga jetësimi i tyre nga pushtetarët përfitues. Rasti më i freskët, Kryeministri i vendit premtoj përfundimin e Autostradës së Gjilanit vitin që tanimë e lamë pas, kurse dje në mbledhjen e Qeverisë, kjo çështje radhitej si një prioritet për ketë vit pa dhënë asnjë arsyetim për dështimin e kësaj pune, e mos të flasim për mungesën e një kërkim falje, të munguar ndaj qytetarëve të kësaj ane. Nuk ka shprehje tjetër pos mashtrim e nënçmim të qytetarëve, dështim total i pushtetit aktual dhe tentim për mes premtimeve (mashtrimit) për te përfituar rishtas votat e Anamoravasve” tha Haziri.

Haziri thotë se kaluan gati 3 vite duke mos ndodhë asgjë e prekshme në planin investiv në këto anë, e kush do besoj që për një vit të mbetur të kësaj nomenklature do ndodh diç me rëndësi.

“Shtrohet pyetja se çfarë do u thonë votuesve të tyre deputetët jo të pakët të kësaj ane, posaçërisht të partisë në pushtet, që mbase disave kurrë nuk iu dëgjua zëri në Kuvend. Asgjë e re, vazhdojmë të mbetemi “Zorra Qorre” e Kosovës dhe atë me fajin tonë, duke u besuar përrallave e premtimeve boshe të sojit të këtillë. Koha është për reflektim qytetar, për të mos kërkuar më vonë lëmosh të modelit “Edhe ne jemi Kosovë”, u shpreh Sokol Haziri./rajonipress/