Opozita kritikon Kurtin për vizitën në Japoni në kohë grevash – e quajnë kryeministër të paaftë dhe të papërgjegjshëm

Kryeministri i Kosovës, Albin Kurti gjatë ditës së djeshme ka udhëtuar për në Japoni, ku përveç pjesëmarrjes në ceremoninë shtetërore të varrimit të ish-kryeministrit të Japonisë, Shinzo Abe, do të zhvillojë edhe takime zyrtare.

E një vizitë e tillë e Kurtit në Japoni, në kohën kohën kur greva në arsim ka hyrë në javën e pestë, edhe mijëra mësimdhënës dhe nxënës kanë mbetur jashtë objekteve shkollore, është kritikuar nga opozita.

Nënkryetarja e PDK-së, Vlora Çitaku e ka quajtur indiferencë dhe mungesë totale të empatisë.

“Jo vetëm pa aftësi, por edhe me keq. Indiferencë. Mungesë totale e empatisë. 320.000 fëmijë kanë mbetur tash e një muaj pa shkollë. E Kryeministri? Në Japoni”, ka shkruar Çitaku.

Kritika ndaj vizitës së Kurtit në Japoni, ka pasur sot edhe kryetari i LDK-së, Lumir Abdixhiku.

Abdixhiku e ka quajtur Kurtin, kryeministër të paaftë, të papërgjegjshëm dhe që nuk di të qeverisë.

“Mbi 320 mijë fëmijë tash e një muaj janë pa mësim – rrinë në shtëpi – por kryeministri i Kosovës zgjedhë të largohet për në Japoni. Paaftësi dhe papërgjegjësi! Ky njeri nuk di të qeverisë!”, ka shkruar Abdixhiku.

Për situatën në sektorin e arsimit kishte reaguar ditë më parë edhe kryetari i AAK-së, Ramush Haradinaj.

Haradinaj ka kërkuar nga Kurti ose të ndal grevën ose të jap dorëheqje, e gjithashtu të shkarkoj edhe ministren e Arsimit, Arbërie Nagavcin.

“Nuk ka një rast tjetër në kohë paqeje që shkollat mbeten të mbyllura një muaj. Kryeministri ose duhet të gjejë zgjidhje, menjëherë, ose duhet ta pranojë se është i paaftë dhe të lëshojë rrugë! Shkarkoje që sonte ministren e arsimit dhe merr vendim për hapjen e shkollave. Mos shko më larg sepse edhe ashtu ke kapërcyer çdo kufi”, kishte shkruar Haradinaj. /Telegrafi/

Shpërndaje.
© RAJONIPRESS