Opozita koordinohet për protesta gjithëpopullore

Tri partitë opozitare, “Vetëvendosja”, AAK-ja dhe “Nisma”, edhe pse nuk kanë arritur ta krijojnë një front opozitar siç ka kërkuar Fatmir Limaj, janë duke i koordinuar veprimet në terren për ta organizuar një valë protestash gjithëpopullore kundër Qeverisë “Mustafa”. Protestat, siç kanë deklaruar përfaqësuesit e këtyre partive, do të mbahen në kundërshtim të dy marrëveshjeve të fundit, asaj për Asociacionin e Komunave me shumicë serbe dhe Marrëveshjen për Demarkacion me Malin e Zi.

Më aktive në terren duket se është Lëvizja “Vetëvendosje”, e cila po mban tribuna me qytetarë, me qëllim që ta bindë elektoratin e saj për t’i kundërshtuar më zëshëm marrëveshjet e fundit që konsiderohet, sipas tyre, të dëmshme për vendin. Mirëpo edhe AAK-ja, që ka qenë një zë kundër Qeverisë, do të deklarohet sot për veprimet e radhës.

Këto protesta, sipas analistëve, konsiderohen si matësi vendimtar i opozitës karshi pushtetit./zeri/