Opozita e përçarë, Qeveria vazhdon mandatin

Deputetë të koalicionit qeverisës janë të bindur se partitë opozitare nuk janë serioze në kërkesat e tyre për zgjedhje të parakohshme parlamentare, prandaj kjo Qeveri do të vazhdojë të funksionojë edhe pa 61 numrat e nevojshëm në Kuvend. Dy partitë opozitare, Lidhja Demokratike e Kosovë dhe Lëvizja Vetëvendosje, pranojnë se nuk i kanë 61 vota për ta rrëzuar qeverinë “Haradinaj” dhe për mungesë të votave e akuzojnë Partinë Socialdemokrate, e cila është bërë patericë e ekzekutivit, shkruan sot gazeta “Zëri”.

Por deputeti i PSD-së Dardan Molliqaj ka ftuar LDK-në dhe LVV-në ta marrin iniciativën për nisjen e mocionit të votëbesimit të Qeverisë, duke ua garantuar edhe votat e deputetëve të tyre.

“Unë i sfidoj ata që ta nisin një mocion mosbesimi dhe do të shohin se si do të votojë PSD-ja. Unë u them se PSD-ja do të votojë për rrëzimin e Qeverisë. Nëse ata konsiderojnë që PSD-ja duhet të sillet sipas agjendës së tyre partiake, mendoj se janë duke gabuar sepse ne jemi në demokraci dhe në pluralizëm e secila parti e ka agjendën e vet se si sillet në opozitë ose në pushtet. Kështu që më duket se mentaliteti i tij i kaluar komunist nuk po e lë të kuptojë se jemi në pluralizëm, nuk jemi në një komunizëm ose në një sistem njëpartiak”, ka thënë Molliqaj për medie.