Opozita e gatshme për zgjedhje të reja, kritika për qeverinë “Kurti”

Tri subjektet opozitare, PDK, LDK dhe AAK, kanë shprehur gatishmërinë për të shkuar në zgjedhje të reja parlamentare.

Shefi i Grupit Parlamentar të PDK-së, Abelard Tahiri, para mediave tha se qeverisë “Kurti” duhet ndërprerë mandati, pasi sipas tij po punon vetëm në dëm të interesave të qytetarëve.

“PDK-ja që nga qershori i vitit 2023 nuk voton asgjë në Kuvend për një arsye të vetme, sepse kërkojmë t’ia ndërpresim mandatin kësaj qeverie, që është kthyer në dëm të interesave të qytetarëve. Kosovës i është ndalë ora ndërkombëtare”, tha ai.

Gjithashtu, ai tha se PDK-ja nga qershori i vitit 2023 kërkon zgjedhje.

“Jemi të gatshëm t’ia shkurtojmë jetën kësaj qeverie”, tha ai.

Të gatshëm për zgjedhje u shprehën nga Lidhja Demokratike e Kosovës.

Shefi i GP të LDK-së, Arben Gashi, tha se partia e tij është e gatshme çdoherë për zgjedhje.

“Sa u përket zgjedhjeve, LDK-ja është partia më serioze në Kosovë dhe jemi të gatshëm kurdo që të mbahen zgjedhjet të marrim pjesë”, deklaroi ai.

Ndërsa, shefi i Grupit Parlamentar të AAK-së Besnik Tahiri theksoi se zgjedhjet do të mundë të shpallen në mesin e gushtit.

“Mesgushti është data kur munden me u shpallë zgjedhjet. Pra, zgjedhje do të ketë në janar, ose shkurt. E Albini ka qejf të mbahen në shkurt”, tha për media Tahiri.

Tahiri ka folur edhe për tri mundësi që vendi të shkojë në zgjedhje.