Opozita, e bindur që do ta zgjidhë ngërçin institucional, duke e formuar Qeverinë

Në bllokun opozitar LDK-AAK-Nisma dhe në lëvizjen “Vetëvendosje” nuk shohin arsye që vendi të shkojë në zgjedhje të reja, shkruan sot Koha Ditore.

Sekretari i Përgjithshëm i LDK-së, Ismet Beqiri, ka thënë të enjten se koalicioni opozitar i ka votat dhe ashtu siç e ka zgjedhur kryetarin e Kuvendit do ta formojë edhe Qeverinë. Beqiri ka thënë se sa i përket asaj se si do të rrjedhin gjërat më tutje me lëvizjen “Vetëvendosje” dhe me Listën Serbe nuk mund të thotë asgjë, por ato deri më tash janë treguar bashkëpunuese. Ai është shprehur se edhe sa i përket “Vetëvendosjes” janë përafruar qëndrimet.

Ndërkaq zëdhënësi i lëvizjes “Vetëvendosje”, Erzen Vraniqi, ka thënë se në Kosovë duhet të ketë formulë të re qeverisëse. Ai ka thënë se lëvizja “Vetëvendosje” në asnjë rrethanë nuk e sheh veten fajtore në rast se vendi shkon në zgjedhje të reja. Pas zgjedhjeve të 8 qershorit në Kosovë ka një ngërç institucional dhe ku punë e madhe i ka dalë edhe Gjykatës Kushtetuese.