Opozita: Buxheti i vitit 2014 i krizës

Buxheti i vitit 2014 është buxhet i krizës dhe i stagnimit ekonomik dhe jo i zhvillimit, thonë zyrtarë të opozitës. Sipas tyre rritja e premtuar e pagave për vitin e ardhshëm nuk mund të jetë më shumë se 10 për qind, ndonëse fondi është për 48 milionë euro më i lartë se ai i këtij viti. Analistët ekonomikë shprehen skeptikë edhe sa i përket rritjes ekonomike.

Zyrtarë të partive opozitare në Kosovë kritikojnë qeverinë sa i përket projekt-buxhetit të vitit 2014. Hikmete Bajrami, zyrtare e LDK-së, njëherësh anëtare e Komisionit për buxhet dhe financa, thotë se ky buxhet i propozuar nga qeveria, parashikohet të jetë pothuajse sa buxheti i vitit 2013, që sipas saj paraqet ngecje, dhe nuk garanton kurrfarë zhvillimi ekonomik.

”Derisa buxheti i vitit 2013 ka qenë 1 miliard e 585 milionë euro, buxheti për vitin 2014 i parashikuar, është vetëm për 5 milionë më i madh, do të thotë kemi një rritje shumë minore e cila nuk është e barabartë as me normën e inflacionit që kemi pasë gjatë vitit 2013. Do të thosha që është buxhet i krizës, nuk ka shuam dallime prej buxheteve tjera, është e njëjta politikë”.

Edhe Haki Shatri ekspert i ekonomisë nga Aleanca për Ardhmërinë e Kosovës, thotë se buxheti i vitit 2014 parashihet të ketë një rritje shumë të vogël krahasuar me buxhetin e këtij viti, që nuk garanton përmirësim të gjendjes socio-ekonomike në Kosovë. Ndonëse fondi i pagave për vitin e ardhshëm është 435 milionë euro, me një rritje prej 48 milionësh krahasuar me fondin e këtij viti, Shatri thotë se rritja e pagave mund të jetë shumë e ultë.

“Kur merret parasysh edhe shtimi i numrit të shërbyesve civilë, ose themelimi i ndonjë institucioni të ri, atëherë del se rritja nominale, pra në numër të pagave nuk mund të jetë më e madhe se 10 për qind, sipas këtij dokumenti të dorëzuar në Kuvend”.

Kurse Ibrahim Rexhepi, drejtor i organizatës STRASS thotë se rritja e vogël e buxhetit e përcjell edhe normën e zhvillimit ekonomik, që sipas tij, vështirë do të mund të arrijë normën e parashikuar prej 4.6 për qind.

“Te buxheti nuk parashihet dicka e veçantë, në energjetikë, bujqësi apo sektorët tjerë të infrastrukturës, prandaj për mua ky 4 për qindëshi është diskutabil, ndonëse një të tillë e ka projektuar edhe FMN-ja”.

Projektbuxheti i vitit 2014 i miratuar javën e kaluar nga qeveria është prej 1 miliardë e 590 milionë euro, kurse të hyrat parashihen prej 1 miliard e 458 milionë euro. Ky dokument pritet të diskutohet edhe në komisionet përkatëse, dhe të miratohet në Kuvend deri më 31 dhjetor të këtij viti./rtk/Indeksonline/