“OJQ “Perspektiva” përgëzon Myftiun Nexhmedin Saqipi

Shoqëria Civile “Perspektiva”, nga Lugina e Preshevës, përgëzon zgjedhjet e reja në Rijasetin e Bashkësisë Islame të Serbisë, institucionit më të lartë fetar në shkallë shteti, i cili në përbërjen e tij përfshin Meshiatin e Serbisë, Sanxhakut dhe Luginës së Preshevës.
Për herë të parë në historinë e këtij Rijaseti, mori pjesë aktive Bashkësia Islame për Bujanoc, Preshevë dhe Bujanoc (BIPBM), të cilën me devotshmëri e drejton Myftiu Nexhmedin ef. Saqipi.

Anëtarët e Asamblesë së Përgjithshme, në seancën e Këshillit të Lartë Zgjedhor, në periudhën 2016-2021, njëzëri zgjodhën për Reis-ul-Ulema të BIS-së, prof. dr. Sead ef. Nasufoviq nga Sanxhaku dhe për zëvendës të tij Myftiun Nexhmedin ef. Saqipi nga Lugina e Preshevës.

E veçanta e këtyre zgjedhjeve në kuadër të Rijasetit të Bashkësisë Islame të Serbisë, është se përfaqësuesit e BIPBM, marrin poste udhëheqëse, duke u nisur nga kryetari i saj Myftiu Nexhmedin ef. Saqipi, i cili emërohet zëvendës i Rijasetit dhe Granit Kamberi, nënkryetar i Kuvendit të Rijasetit.

Gjithashtu, në kudër të Kuvendit të Rijasetit, janë zgjedhur 10 anëtarë të BIPBM, nga Presheva, Bujanoci dhe Medvegja.

Emërimi i Myftiut Nexhmedin ef. Saqipi, për zëvendës të Rijasetin e Bashkësisë Islame të Serbisë, liroi nga posti i koordinatorit të lëndës fetare për Luginën e Preshevës, ku në vend të tij emërohet prof. Bejtullah Bejtullahu, i cili aktualisht është profesor i lëndës fetare dhe kryetar i KBI-së në Bujanoc.

Shoqëria Civile “Perspektiva” e konsideron si shembull të përsosur riorganizimin e BIPBM, qoftë në nivel lokal e rajonal, qoftë edhe në nivel institucional shtetëror, e cila në vazhdimësi zhvillon, promovon dhe avancon vlerat fetare të Luginës së Preshevës.

Le të shërbej, ky, një model dhe hap përpara i BIPBM edhe për organizimet e tjera politike e kulturore, duke filluar nga Trupi Koordinues, një organ i lartë shtetëror i krijuar para 16 vitesh për zgjidhjen e problemeve të shqiptarëve, e mjerisht udhëhiqet nga joshqiptarët.

Shoqëria Civile “Perspektiva”, i dëshiron zëvendës Reisit Nexhmedin ef. Saqipit, suksese në misionin e tij, rreth forcimit të pozitës së besimtarëve myslimanë në Luginë dhe Serbi, duke e ruajtur, mbrojtur dhe avancuar institucionalisht integritetin dhe dinjitetin e fesë, njërën nga vlerat më të ndjeshme të shoqërisë sonë, thuhet në përgëzimin e Shoqërisë Civile nga Lugina e Preshevës./rajonipress/

Shoqëria Civile “Perspektiva”, në Bujanoc