OEAK-u kundër tërheqjes së mjeteve nga Trusti, kërkon veprime nga Qeveria ndaj rritjes së çmimeve

Një ditë pasi Qeveria e Kosovës doli me qëndrimin e saj kundër tërheqjes së mjeteve nga Trusti Pensional, të njëjtin qëndrim e ka shfaqur edhe Oda Ekonomike Amerikane në Kosovë.

Ky institucion thotë se diskutimet e fundit publike dhe nismat legjislative për të mundësuar tërheqjen e kursimeve pensionale janë shqetësuese.

“Oda Amerikane beson fuqishëm që masat e tilla janë në kundërshtim me qëllimin për të cilin Fondi i Kursimeve Pensionale ekziston dhe që masa do të kishte përfitime afatshkurta socio-ekonomike. Kursimet pensionale të qytetarëve duhet të mundësojnë një standard të dinjitetshëm të jetesës pas pensionimit të tyre, prandaj reduktimi i vlerës së kursimeve pensionale do të cenojë standardin e jetesës në moshën pas pensionimit”, thuhet në reagimin e OEAK-ut.

Oda Ekonomike Amerikane në Kosovë i ka bërë thirrje Qeverisë që të konsiderojë rishikimin e politikave tatimore për produktet esenciale ashtu që ta bëjë të përballueshme situatën aktuale të çmimeve të ngritura për qytetarët e Kosovës, e veçanërisht atyre me nivel më të kufizuar të të ardhurave. /Zëri/