OEA: Kemi nevojë për punë, jo për pushime

Bartja e ditëve të festave zyrtare nga ditët e vikendit në ato të punës, siç ndodhi me Kurban Bajramin e fundit, po shihet si dëm për institucionet dhe ekonominë në përgjithësi.

Përfaqësuesit e Odës Ekonomike Amerikane (OEA), vlerësojnë se në një mjedis ku nuk ka lehtësira për biznese, atëherë çdo ngarkesë tjetër, siç janë ato që prodhojnë ditët e festave, përbënë pengesë të madhe.

“Jemi një shtet që kemi nevojë të punojmë më tepër dhe jo të pushojmë. Ngarkesa, e cila bie mbi sektorin privat, i cili do të vazhdojë të punoj, do të detyrohet t’i paguajë punonjësit sipas normave të parapara me Ligj, gjatë festave zyrtare, është pengesë”, ka thënë kryetari i kësaj Ode, Arian Zeka.

Ai thekson se nga anketat që kanë realizuar me përfaqësues të dhjetëra bizneseve pikërisht lidhur me festat zyrtare del se numri i madh i këtyre festave dhe bartja e tyre nga vikendi në ditët pasuese po shkakton rënien e produktivitetit në punë. /Koha Ditore/