O’Connell flet për korrigjimin e kufijve: Qëndrimi i Britanisë është i njëjtë me atë të vitit 2005

Ambasadori i Britanisë së Madhe në Kosovë, Ruairi O’Connell ka nisur bashkëbisedimin e tij me qytetarë përmes Facebook-ut.

Në pyetjen e parashtruar nga Telegrafi rreth çështjes së korrigjimit të kufijve, ambasadori O’Connell ka thënë se qëndrimi i Britanisë është i njëjtë me atë të vitit 2005.

“Pse po pyetni kur ju e dini qëndrimin e Britanisë. Pozita jonë nuk ka ndryshuar që nga vitit 2005″, është përgjigjur ambasadori britanik.

Kujtojmë se kundër korrigjimit të kufijve përpos Britanisë ka dal edhe Gjermania, të cilët kanë thënë se thirrjet për ndryshimin e kufijve të Ballkanit mund të sjellin destabilizim.

O’Connell po ashtu ka theksuar se qytetarët janë ata të cilët duhet të vendosin për ndryshime në Kosovë.

Në një përgjigjej të tij gjatë bashkëbisedimit me qytetarët në Facebook, O’Connell ka shkruar se: ” Nuk ka rëndësi se si e vlerësoj unë. Ajo që ka rëndësi është si e vlerësojnë qytetarët. Kam katër vite që jap porosi të njëjtë. Nëse qytetarët dëshirojnë ndryshimin dhe nëse vlerësojnë se politikanët duhet të mbahen përgjegjës, atëherë ata duhet të flasin vetë dhe ta bëjnë ndryshimin. Askush nuk mund ta bëjë këtë për ju. Mos prisni që Bashkësia Ndërkombëtare apo diplomatët ta bëjnë këtë. Por unë jam optimist, flas çdo ditë me qytetarët dhe e di energjinë e tyre por për këtë duhet të kenë shpresë dhe besim që ata mund ta ndërtojnë një të ardhme më të mirë”

Ndryshe, sot në Bruksel pritet të mbahet takimi i radhës ndërmjet dy presidentëve, atij të Kosovës, Hashim Thaçi dhe të Serbisë, Aleksandar Vuçiq.

Thaçi ditë më parë ka thënë se duhet një marrëveshje gjithëpërfshirëse ndërmjet Kosovës dhe Serbisë për normalizimin e raporteve.

Presidenti i vendit ka prezantuar edhe idenë e korrigjimit të kufirit ndërmjet Kosovës dhe Serbisë, por që po kundërshtohet ashpër edhe nga partitë politike në vend. /Telegrafi/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).