NZZ: “Përparim Avdili, ky njohës i shqiptarëve”

Aktualisht “njohësi i shqiptarëve”, siç e quan ai veten në shaka, po e bën një tur të ri në zgjedhjet komunale ose për Asamblenë e Qytetit të Cyrihut. Dhe sërish Avdili dëshiron t`i drejtohet komunitetit shqiptar, zviceranëve me prejardhje të huaj, të cilët përndryshe ndihen të përfaqësuar dobët nga politika.

Në numrin e saj të sotëm gazeta prestigjioze zvicerane NZZ ka bërë prezantimin e katër “secondo”-ve, gjegjësisht politikanëve me prejardhje të huaj që janë të zgjedhur ose që kandidojnë për parti të ndryshme për një vend në Asamblenë e qytetit të Cyrihut. I pari në këtë katërshe është, politikani i ri, tashmë i njohur mirë për lexuesit e albinfo.ch, Përparim Avdili, kandidat nga FDP (Partia Liberale) për Asamblenë e Qytetit të Cyrihut.

“25 sekonda. Më e gjatë nuk ishte videoja të cilën para tri vitesh Përparim Avdili e kishte publikuar në Youtube. 25 sekonda mjaftuan që ta katapultonin 27 vjeçarin e atëhershëm nën dritat e reflektorëve. Ai po kandidonte për Parlamentin e Kantonit të Cyrihut.

“Politikani i FDP-së po del me gjuhën shqipe në gjah për vota”, kishte titulluar “Blick” një artikull kushtuar këtij rasti. Në vazhdim gazeta e prezanton tekstin në origjinal, në gjuhën shqipe nga videoja në fjalë: “Për Një shoqëri të lirë dhe solidare pa diskriminim”, transmeton albinfo.ch.

Për eksponentët e SVP-së kjo ishte e tepruar. Fushatën zgjedhore duhet udhëhequr në njërën nga gjuhët e vendit, theksonin kritikët. Por, Avdilin nuk e ka dëmtuar prania mediale. Ai në zgjedhje ishte ngritur nga vendi i pestë në listë, në vendin e tretë. Një rezultat i mirë, jo tipik për një kandidat me emër të huaj. Por megjithatë kjo nuk i kishte mjaftuar për t`u zgjedhur.

Aktualisht “njohësi i shqiptarëve”, siç e quan ai veten në shaka, po e bën një tur të ri në zgjedhjet komunale ose për Asamblenë e Qytetit të Cyrihut. Dhe sërish Avdili dëshiron t`i drejtohet komunitetit shqiptar, zviceranëve me prejardhje të huaj, të cilët përndryshe ndihen të përfaqësuar dobët nga politika. Jehona e paraqitjeve të tij para shoqatave të Secondove ka qenë pozitive.

Avdili është i lindur në fshatin e vogël shqiptar Lojan të Maqedonisë. Kur situata politike nga fundi i viteve të tetëdhjeta u trazua, familja e tij u tërhoq në Cyrih. Babai i tij, dikur mësues, antikomunist i përbetuar, punonte si shofer kamioni. Një fillim i ri në një profesion të detyruar. Përparimi i ri ishte kohë pas kohe i detyruar të luftonte me kundërshti të ndryshme. Në mësimin e zanatit për elektricist të makinave ai ka përjetuar edhe etiketime raciste. Kaq rëndë e ka përjetuar këtë, sa që kishte ndërprerë zanatin. Por, në vend se t`i dorëzohej dëshpërimit, ai i kishte thënë vetes: “Ua tregoj unë atyre!”. Kështu ai mbaroi një shkollë për tregti, pastaj studimet dhe bëri karrierë në banka të ndryshme. “Kush tregon rezultate, mund t`ia dalë në Zvicër”, thotë ai sot. Kështu, ai u lidh me liberalizmin, transmeton albinfo.ch. “Nuk ka rëndësi prej nga vjen por ka rëndësi ajo çfarë bën nga kjo”. Këtë vlerë përpiqet t`ua përcjellë bashkatdhetarëve të tij kryetari i degës së FDP-së të Qarkut të 9. Këtë po e bën përms shumë kontakteve të drejtpërdrejta dhe përmes një videoje të re, të cilën aktualisht është duke e punuar. Krahas shqipes, ajo do të jetë edhe në gjuhën gjermane.

6 nga 10 qytetarët e Cyrihut kanë prejardhje të huaj

Njerëzit me prejardhje të huaj janë të nënpërfaqësuar në politikën e Cyrihut. Është kjo një e vërtetë e njohur dhe nuk është karakteristikë vetëm për Cyrihun. Por, metropoli më i madh zviceran, mund të quhet edhe “qytet i migrantëve”, për faktin se “3 në 10 banorë të këtij qyteti nuk kanë pasaportë zvicerane ndërsa madje 6 nga 10 qytetarë kanë prejardhje të huaj”, shkruan nzz.ch. Ndërsa në politikën institucionale ky grup i madh është pothuaj i pavërejtshëm.

Tryezë debati për “secondo”-t

Shoqata mbipartiake “Secondas Zürich” e cila përfaqëson interesat e migrantëve të Cyrihut organizon të hënën, më 22 janar një tryezë debati në prag të zgjedhjeve për asamblenë dhe për qeverinë komunale, shkruan albinfo.ch. Të gjithë pjesëtarët e ekzekutivit të deritashëm dhe kandidatët e rinj ballafqohen për herë të parë në mënyrë publike lidhur me temat si: natyralizimi, integrimi dhe participimi politik. Tryeza mbahet në “Zentrum Karl der Grosse” të Cyrihut, me fillim në orën 19.

http://www.albinfo.ch/nzz-perparim-avdili-ky-njohes-shqiptareve/