Gjilan – Në kuadër të projektit trashëgimia Kulturore , vlerë e shoqërive të civilizuara Organizata jo qeveritare Elita në bashkëpunim me Ministria për Kulturë Rini dhe Sport (Departamenti i Rinisë) dhe Drejtorinë Komunale të Arsimit të Vitisë kanë vizituar sot me nxënësit më të dalluar të kësaj komune vendet e ndryshme të trashëgimisë kulturore të Vitisë, ku me këtë rast kanë vizituar për së afërmi shkollat e para shqipe në Stubëll dhe Pozheran, shpellat parahistorike që supozohet që janë nga koha e gurit, dy nga 5 kalajet që gjendën në Viti dhe Kllokot si ajo e Tërpezë dhe Gërçarit di dhe disa vende të tjera.
Gjatë vizitës që ju është bërë këtyre vendeve Historiani Adem Murati i ka njoftuar nxënësit me historikun e tyre. Ai tha se Vitia në përgjithësi ka një trashëgimi të pastër kulturore por se duhet të bëhet më shumë në identifikimin,ruajtjen dhe promovimin e tyre me qëllim që gjeneratat e ardhshme të njihen me historinë dhe të kaluarën e popullit të tij.
Ndërsa Ibrahim Sefedini nga OJQ Elita u shpreh se ky projekt ka për qëllim që nxënësit e Vitisë të njoftohen për vlerën e trashëgimisë kulturore.
Sipas tij nxënësit që kanë marrë pjesë në këtë vizitë janë ftuar që të shkruajnë një ese me temën “Trashëgimia Kulturore ,vlerë e shoqërive të civilizuara” ku më pas për esenë më të mirë do të ndahen edhe shpërblime.
Ndërsa disa nga nxënësit u shprehen se falë këtij projekti ata janë njohur për së afërmi me trashëgiminë kulturore të Vitisë për të cilët sipas tyre ka qenë e panjohur duke e cilësuar projektin në fjalë si shumë të dobishëm.
Ndërsa para nxënësve kanë folur edhe zyrtarë nga DKRS-ja ndërkaq për identifikimin e objekteve dhe vendeve të trashëgimisë kulturore në territorin e Vitisë ka folur edhe zyrtari Alban Sokoli./rajonipress/
