Nushi: Kosova po noton në turbullira e mjegull

Gjilan – Majlinda Nushi kryetare e PSD-së në tubimin përmbyllës në Gjilan tha se Kosova nuk po ecën me ritëm të dëshirueshëm pasiqë imazhi i saj është fokusuar në krim të organizuar e korrupsion. Kosova meriton një jetë më të dinjitetshme dhe PSD i ka kapacitetet që ta bëjë këtë. Ismet Hajdini tha se PSD po rritet çdo ditë në Gjilan.

Edhe dega e PSD-së në Gjilan të enjten e ka mbyllur fushatën parazgjedhore. Majlinda Nushi kryetare e PSD-së tha se Kosova nuk po ecën me ritmin e dëshiruar sepse rruga për në Evropë është me plotë sfida derisa Kosova ka krijuar para botës një imazh të keq ku dominon krimi e korrupsioni, raporton rajonipress.

Nushi tha se PSD ka kapacitete që të shtyjë proceset përpara edhe pse disa na thonë se jemi parti e vogël.”PSD ka njerëz të profesionalizuar dhe autoritativë që mund të ndihmojnë shumë në ndërtimin e imazhit të një Kosove evropiane e të civilizuar” tha ajo.

Nushi tha se Kosova po noton në ujëra të turbullta e të mjegulluara .”Kosova meriton një jetë më të dinjitetshme e jo kështu siç jemi tani me shumë të papunë, drejtësia nuk funksionon fare. PSD synon pushtet për qytetarin e jo për pushtetarin “ tha Nushi.

Kurse Ismet Hajdini kryetar i PSD-së tha se PSD në Gjilan po rritet çdo ditë sepse ka aderime të shumta nga të gjitha profilet.”Kemi vizituar shumë lagje e fshatra dhe kemi vërejtur se qytetarët janë të interesuar të ndryshojnë dhe ne si PSD presim shumë nga këto zgjedhje në Gjilan” tha Hajdini./rajonipress/