Nuri Seferi, më 23 gusht, kundër Garreth Wilsonit

Boksieri shqiptar Nuri Seferi më 23 gusht do të zhvillojë meçin kundër boksierit amerikan Garreth Wilson. Kështu ka bërë të ditur të dielën për “kosovaboxing.org” vetë boksieri nga Maqedonia.

Ky meç do t`i shërbejë Seferit të përmirësojë bilancin dhe të ngrihet në renditje, pasi në rast të fitores mund të marrë vendin e parë apo të dytë në versionin WBO.

Po ashtu me fitore ai do të renditej në mesin e dhjetë më të mirëve në versionin IBF, ku Wilson renditet i 11-ti. “Kam nënshkruar kontratën që më 23 gusht në Rumani boksoj kundër amerikanit Wilson. Kundërshtari do të jetë i vështirë, por unë kam besim në veten time dhe do të triumfoj”, ka thënë Seferi.

Wilson deri më tash ka zhvilluar 20 meçe profesioniste dhe ka bilanc prej 13 fitoreve (7 KO), 6 humbjeve dhe një barazimi. Seferi ka 33 fitore (20 KO) dhe 6 humbje. “Dua që sërish të zhvilloj një meç me kundërshtar të denjë. Shpresoj që gjithçka të shkojë sipas planit më 23 gusht”, ka shtuar Seferi.