Nuk u ftua për ndeshjet e marsit nga Challandes, ylli i Kosovës gjen ‘strehë’ në Itali

Donis Avdijaj është bërë një emër mjaft i njohur në futbollin evropian për shkak të problemeve të tij disiplinore.

Ish-anëtari i Schalkes së fundmi është paraqitur me skuadrën e Willem II në Holandë, por tani është pa klub për shkak se klubi holandez ia ndërpreu kontratën.

Tani, Avdijaj ka marrë leje që të luajë në divizionin e dytë të futbollit italian.

‘Dosja e gjatë’ e Donis Avdijajt

Në Schalke, Avdijajt nuk i eci mbarë që prej ardhjes së trajnerit Domenico Tedesco, i cili vendosi ta largojë nga skuadra e tij futbollistin 22-vjeçar, shkruan Zëri.

Megjithatë, në kampionatin elitar holandez, Eredivisie, Avdijaj bëri bujë duke u transferuar në Willem II.

Ai zhvilloi 18 paraqitje në sezonin debutues, ku kontribuoi me tetë gola dhe gjashtë asistime. Statistika të ‘frikshme’ nga një përforcim i ri.

Por, problemet disiplinore që ai i shkaktoi në Willem II si dhe gjendja e dobët fizike bën që ai të ndahet edhe me klubin holandez.

Ri-fillimi në Itali?

Tani, sipas mediumit italian “TuttoMercatoWeb”, Avdijaj, i cili ka gjashtë paraqitje me Përfaqësusen e Kosovës, ka një mundësi të re.

Më 26 mars, ai ka arritur në Pescara, përkatësisht në qendrën “Delfino Pescara” për prova.

Skuadra nga divizioni i dytë i futbollit italian mund të jetë një ‘strehë’ e re për Avdijajn, i cili kohë më parë kërkohej edhe nga Arsenali dhe Juventusi.

Pescara, klub i krijuar në vitin 1936, është duke sfiduar për t’u rikthyer në kampionatin elitar italian, Serie A.

Në divizionin e dytë, skuadra e Giuseppe Pillon renditet në vendin e pestë, andaj në klub kanë shpresë që Avdijaj mund ta bëjë diferencën.

Në afatin kalimtar dimëror, Avdijaj ishte i lidhur edhe me një transferim në Zvicër, përkatësisht te FC Luzern.

Megjithatë, një marrëveshje dështoi të arrihej për arsye të panjohura.

Objektivi primar i Avdijajt është tani t’iu shmanget problemeve dhe ta fillojë një aventurë të re duke shfrytëzuar në maksimum talentin që ai e posedon.

Ndryshe, Donis Avdijaj nuk ishte i ftuar nga trajneri i Kosovës, Bernard Challandes për dy ndeshjet e fundit kundër Danimarkës dhe Bullgarisë për shkak të mungesës së minutazhit të lojtarit.

Duke lënë anash problemet disiplinore, mund të themi se Avdijaj ka talent për t’u bërë një lojtar i jashtëzakonshëm, ndërsa vlera e tij në treg sipas “TransferMarkt” është 1.8 milionë funte./Zëri/