Nuk lëshojnë pe

Kuvendi i Kosovës po hyn në muajin e dytë të bllokadës, përderisa pozita dhe opozita nuk kanë lëvizur nga pozicionet e tyre rreth marrëveshjeve të arritura për Asociacionin e Komunave Serbe dhe Demarkacionin e Kufirit me Malin e Zi.

Analistët politikë thonë se në këtë situatë të krijuar nevojitet edhe përfshirja e presidentes Jahjaga, duke i ftuar në një tryezë të përbashkët dy palët.

Azem Vllasi, analist politik, thotë për “Zërin” se kërkesat ultimative të opozitës do të ishte mirë që të shtroheshin në një tavolinë të përbashkët të bisedimeve në mes pesë liderëve partiakë. “Do të ishte mirë që të uleshin të gjithë pranë një tryeze të përbashkët politike tek presidentja e vendit, Atifete Jahajga, bashkë me ambasadorët e shteteve të Quint-it dhe të diskutoheshin të gjitha aspektet e marrëveshjeve, edhe për dobitë dhe pasojat nga mundësia e tërheqjes së nënshkrimit nga Marrëveshja për Asociacionin e Komunave Serbe dhe Demarkacionit me Malin e Zi”, ka thënë ai.

Analisti Vllasi shton se nuk ka mundësi të tërheqjes së nënshkrimeve nga marrëveshjet e arritura. “Nëse tërhiqen nënshkrimet do ta shohim veprimin e palës serbe, e cila do t’i tërheqë të gjitha marrëveshjet e arritura në Bruksel që do të çonte në një situatë ku nuk do të jenë kufijtë sikurse janë në Jarinjë dhe Bërnjak, do të bie marrëveshja doganore, do të riktheheshin strukturat paralele në veri dhe Serbia do të jetë e pranishme në Ibër”, ka thënë ai./zeri/