Nuk lejohet protesta e këshillit protestues kundër riorganizimit të shkollave në Kamenicë

Kamenicë – Pas vendimit të Kryetarit të Kamenicës, Qëndron Kastrati, për mbylljen e shkollave në fshatrat Karaqevë e Poshtme, Busavat, Kopërnicë, Petrit, Shipashnicë e Poshtme e Krilevë të Komunës së Kamenicë, tani e një muaj nxënësit e këtyre lokaliteteve ende nuk i kanë shijuar bankat shkollore.

Edhe pse këshilli protestues kishte leje për ta mbajtur këtë protestë para Qeverisë së Kosovës një gjë e tillë ju pamundësua, për ta mbajtur protestën nga Shërbimi Policor në Kryeqytet.

Kryetari i këshillit protestues nga fshati Kopërnicë, Kadri Rahimaj, ka bërë të ditur se janë të indinjuar për këtë veprim të Shërbimit Policor.
“Ne sot ishim për të protestuar para Qeverisë së Kosovës në emër të Bashkësive Lokale ku po tentohen të mbyllen shkollat në fshatrat tona, ne edhe pse kishim bërë kërkesë me kohë për mbajtjen e kësaj proteste, ne kishim leje për të protestuar por Shërbimi Policor nuk na lejoi për të mbajtur protestën duke ndërhyrë, duke ndalur zërimin dhe na pamundësuan mbajtjen e saj, gjithashtu ata edhe na kanë dënuar këshillin protestues me 200 euro”.

Rahimaj ka bërë të ditur se në ditët në vazhdim do të dalim me një deklaratë të përbashkët nga të gjitha fshatrat që po tentohet t`ju mbyllen shkollat./rajonipress/