Nuk largohet nga Bayerni

Xherdan Shaqiri ka konfirmuar se nuk do të largohet nga Bayern Munichu.

Mesfushori kosovar ka vendosur të qëndrojë në “Allianz Arena”, përkundër faktit se ishte vazhdimisht në qendër të spekulimeve për t’u larguar nga Gjermania.

Emri i Juventusit ishte përmendur konstant si një opsion i mundshëm i 22 vjeçarit, por edhe Liverpooli kohë pas kohe e kërkonte.

Së fundmi u fol për Spartak Moskën, por përfaqësuesi zviceran i ka hequr të gjitha dilemat, duke treguar se do të jetë në dispozicion të Pep Guardiolës edhe sezonin e ardhshëm.

Dëshirë e futbollistit ishte të shkojë në një ekip ku mund të luante rregullisht, por gjiganti bavarez vendosi ta mbajë, pasi llogarit në shërbimet e tij, përkundër faktit se nuk po luan rregullisht.

“Do të doja të largohem nga Bayerni për ta pasur mundësinë që të luaj më shumë. Mirëpo, klubi ka dashur që unë të qëndroj këtu”, deklaroi fillimisht përfaqësuesi zviceran për “Sky Sport Gjermania”.

Tash, ai po mendon për sezonin e ri, ku do të mundohet ta bëjë më të mirën.

Shaqiri luajti nga minuta e parë në duel me Schalken në fundjavë, por kjo nuk nënkupton se ai e ka të garantuar vendin e titullarit.

Konkurrenca e fortë ka bërë që ai të përfundojë shpesh në bankë.

“Prandaj, pasi vendosa të qëndroj, do të vazhdoj ta bëj më të mirën për Bayernin”, përfundoi Shaqiri.