“Nuk keni të drejtë morale të flisni”, “VV-ja nuk mund të arrijë atë që ka arritur LDK-ja në Shtëpinë e Bardhë” – Selmanaj përplaset me Bislimin dhe Muratin për të zhdukurit

Një përplasje mes deputetit të LDK-së, Dirton Selmanaj dhe zëvendëskryeministrit Besnik Bislimi e ministrit Hekuran Murati, ka ndodhur në seancën e sotme të Kuvendit, për çështjen e Deklaratës për personat e zhdukur që u nënshkrua në Bruksel.

Selmanaj tha se përmes pajtimit për një deklaratë të tillë, Kosova ia mundëson Serbisë që të heq përgjegjësinë penale juridiko-shtetërore për zhdukjet e dhunshme.

“Qeveria e Kosovës ka gabuar rëndë që ka pranuar që zhdukja me dhunë të hiqet nga dokumenti. Po ua citoj nenin 2 të Konventës së OKB-së ku thuhet se zhdukje me dhunë konsiderohet çdo arrestim ndalim nga agjentë të shtetit apo grupe personash nën autorizimin e shtetit”, tha Selmanaj.

Ai shtoi se heqja e fjalisë “të zhdukur me dhunë” tregon se Kurti ka për qëllim tejkalimin dhe jo adresimin e krimeve.

E ndaj kësaj deklarate reagoi zëvendëskryeministri Besnik Bislimi. Ai prezantoi një deklaratë të nënshkruar nga ish-kryeministri Avdullah Hoti në vitin 2020.

“Kjo është deklarata që është dakorduar në Bruksel më 7 shtator 2020 nga ish-kryeministri Hoti. Ka vetëm 7 fjali, dhe 6 prej tyre tregojnë se kush do të jetë kryesues i komisionit si do të krijohet komisioni ka zero brengë dhe sqarime se sa i rëndësishëm është problemi i personave të pagjetur dhe e ka titullin ‘missing persons’. Këtu thotë se çështja e të pagjeturve do të trajtohet një vit pasi të kemi marrëveshjen finale me Serbinë”, tha Bislimi.

Ai shtoi se më 8 shtator 2020 janë deklaratat e Selmanajt kur thotë se kjo temë është konsumuar.

“Deklarata që kemi dakroduar në Bruksel e ka titullin ‘deklarata e kryeministrit Albin Kurti’. Më tregoni që nga data e fillimit të negociatave në Bruksel në vitin 2011 deri në këtë dokument ku kemi 39 marrëveshje, kur një udhëheqësi të Kosovës i është referuar me titullin kryeministër. Ju po thoni që keni gabuar që keni hequr termin persona të zhdukur me dhunë, tregoni kur ju e keni futur në dokumente këtë term”, tha Bislimi.

Pas kësaj reagoi edhe deputeti Selmanaj. Ai e quajti fat të tmerrshëm përfaqësimin e Kosovës nga zëvendëskryeministri i Kosovës, Besnik Bsilimi.

“Është fat i tmerrshëm për Kosovën që ka një nivel të tillë të përfaqësimit me këtë person. Tema e të pagjeturve janë fakte historike kurdo që dëshironi ju sjellim me dokumente konkrete. Ka qenë tema top prioritet i Qeverisë Hoti, ne kemi thënë që nuk ka marrëveshje për asnjë temë tjetër pa njohjen reciproke”, tha Selmanaj.

Ai shtoi se “unë e kam përsërit me qindra herë, që çështja e raportimit si instrument është konsumuar kurrë nuk kam thënë se çështja e të pagjeturve është konsumuar, por skenari perfid, idoteskt që LVV e ka ndërtuar atëherë si kauzë kundër meje dhe fatkeqësisht vazhdon edhe sot një pseudo-profesor të thirret. Çdo kush që ka gjak shqiptari tema e të pagjeturve nuk konsumohet kurrë, a ju dikush që dyshoni në gjakun tuaj nuk ju kam faj unë dhe këtë duhet ta dini”.

Në këtë debat u përfshi edhe ministri i Financave, Hekuran Murati.

Murati ka thënë se Qeveria Hoti ka nënshkruar marrëveshje ku nuk përmendet as emri i shtetit të Kosovës, por thirret në kryeqytet. I ka thënë LDK-së se nuk ka të drejtë morale dhe profesionale të flas për këtë çështje.

“Për t’ia rikujtuar në Washington çka ka nënshkruar Qeveria Hoti, është: të dyja palët zotohen të përshpejtojnë përpjekjet që të lokalizojnë dhe identifikojnë mbetjet e personave të humbur. Më poshtë thotë: do t’i koordinojmë këto përpjekje mes Beogradit dhe Prishtinës. Domethënë as emri i shtetit nuk figuron në marrëveshje. Së paku emrin e shtetit është dashtë ta përmendni. A keni qenë ju i nderuar deputeti Selmanaj në atë kohë, a i keni lexuar çfarë po nënshkruani, a e keni pa çka po shkruan në atë tekst. Ju lutem, nuk keni të drejtë morale e as profesionale për të folur për këto tema”, ka theksuar Murati.

Deputeti Driton Selmanaj duke iu drejtuar ministrit të Financave ka thënë se VV-ja nuk mund të arrijë atë që ka arritur LDK-ja në Shtëpinë e Bardhë, edhe sikur t’i ketë tri jetë.

“Unë po provoj të diskutoj së paku me njerëzit që na shikojnë sepse vërtete nuk ia vlen me nivelin e tij. Në marrëveshjen e Washingtonit ti djalë i mirë, edhe tri jetë mi pas ti s’ke me mund me e mbërri çfarë kemi arritur në Shtëpi të Bardhë”, ka thënë ai. /Telegrafi/

Shpërndaje.
© RAJONIPRESS