Nuk ka Ushtri të Kosovës as gjatë vitit 2017
RajoniPress
21:57, 5 Dhjetor, 2016
Buxheti i ndarë nga Qeveria e Kosovës për FSK-në, prej 51 milion euro për vitin 2017, e ka bërë të pa mundur shndërrimin e FSK-së, në Ushtri të Kosovës, gjatë vitit të ardhshëm për shkakun se ky buxhet nuk siguron as mbijetesën e kësaj force, kanë thënë anëtarë të Komisionit për Siguri dhe Mbikëqyrjen e Forcës së Sigurisë së Kosovës.
Deputeti i vetëvendosjes Rexhep Selimi, i ka thënë Indeksonline se themelimi i Ushtrisë së Kosovës, nuk do të mund të bëhet as gjatë vitit të ardhshëm.
Sipas Selimit, me këtë buxhet Qeveria e Kosovës, e mban në kufij të mbijetesës FSK-në që nuk garanton as mbijetesë, por gjithsesi nuk garanton as zhvillimin e saj.
“Qeveria e Kosovës me buxhetin aktual për FKS-në nuk ka paraparë asnjë rritje sa i përket zhvillimit, po ashtu njëjtë kjo vlen edhe për Ministrinë e FSK-së. Ndërkaq shtesë për buxhet për ta shtyrë përpara themelimin ose rritjen e kapaciteteve ushtarake në këtë rast operacionale, ka paraparë vetëm 5 milion euro të cilat vlejnë vetëm sa gjysme kilometri asfalt që është shtruar nga një kompani e huaj, e kontraktuar nga Qeveria”,ka thënë Selimi.
Ndërkaq në anën tjetër Kryetari i Komisionit për Buxhet dhe Financa, Naser Osmani ka thënë për Indeksonline se, buxheti për FSK-në, ka shënuar rritje në krahasim me buxhetin e këtij viti sa ishte prej 49 milion euro.
Osmani ka treguar se në buxhetin e cili do të dërgohet këtë javë për votim në Kuvendin e Kosovës, është paraparë që FSK-së për vitin 2017 ti ndahet një buxhet prej 51 milion e 35 mijë euro.
Ndërsa në zhvillimin afatgjatë të Forcës së Sigurisë së Kosovës, deputeti Rexhep Selimi, ka thënë se Qeveria ka paraparë një shumë qesharake shtesë prej vetëm 5 milion euro deri në vitin 2022.
“Paramendojeni se sa me seriozitet e ka trajtuar Qeveria e Kosovës rritjen e kapaciteteve mbrojtëse ushtarake. Kjo nuk është e rastësishme, përkundrazi është e qëllimshme sepse do ta mbante FSK-në në buzë të mbijetesës, sikurse një pacient as nuk e kanë lënë të vdes e as nuk e kanë quar nga shtrati.
Me këtë buxhet harrojeni që Kosova do të ketë ushtri ose kapacitetet e saja mbrojtëse, për vitin 2017 as mund të flasim për shndërrimin e saj në ushtri”, ka thënë deputeti Selimi. /Indeksonline/
