Nuk aplikojnë për falje të borxheve

Ligji për Faljen e Borxheve, i cili është funksional deri në shtator të këtij viti, nuk po jep rezultate në shlyerjen e borxheve.

Zyrtarë të Ministrisë së Financave kanë bërë të ditur për gazetën “Zëri” se ligji pritet që në të ardhmen të plotësohet në mënyrë që deri në shtator shumë qytetarë të vendit t’i përgjigjen këtij ligji. Me këto plotësime qytetarët të cilët kanë borxhe deri më 2008 dhe nga 2009 deri në 2014 nuk kanë borxhe nuk janë të obliguar që të bëjnë kërkesë për shlyerje të borxhit ashtu siç po ndodh tash.

Agim Dibrani, kryetar i Komisionit për Faljen e Borxheve, ka thënë se kjo mënyrë do të ndikojë që të arrijnë të falen më shumë borxhe.

“Ligji aktual duhet të plotësohet, ngase ashtu siç është ka pak paqartësi. Në bazë të ligjit aktual qytetarët që kanë pasur borxhe nga përfundimi i luftës deri në vitin 2008 është dashur që të aplikojnë për falje të borxheve. Mirëpo, me ndryshimet që pritet të bëhen në këtë ligj ata nuk obligohen ta bëjnë një gjë të tillë. Thënë më shkurt qytetarëve që kanë borxh në këtë periudhë kohore do t’u shlyhet ai në mënyrë automatike”, ka thënë Agim Dibrani.

Qytetarët që nga tetori i vitit të kaluar kanë filluar që të aplikojnë për falje të borxheve, por sipas rezultateve të Ministrisë së Financave deri në muajin maj, rezultatet nuk janë të kënaqshme./zeri/