Nuhiu e Avdijaj në pritje të FIFA-s

Përzgjedhësi i Kosovës, Albert Bunjaki, ka thënë se Atdhe Nuhiu dhe Donis Avdijaj kanë kompletuar dokumentacionin dhe janë në pritje të FIFA-s.

Kombëtarja e Kosovës është në pritje të FIFA-s, e cila duhet të vendosë nëse Atdhe Nuhiu dhe Donis Avdijaj mund të luajnë kundër Islandës, ndeshje e cila do të zhvillohet me 24 mars në Shkodër, në kuadër të kualifikimeve për Kupën e Botës.

Përzgjedhësi Albert Bunjaki ka treguar se janë kompletuar dokumentacionet e këtyre dy lojtarëve dhe nëse përgjigjja është pozitive, atëherë ata të dy do të ftohen për Islandën.

“Atdhe Nuhiu dhe Donis Avdijaj kanë kompletuar dokumentacionin dhe jemi në pritje të FIFA’s. Nëse kemi përgjigje pozitive, ata do të jenë pjesë e listës kundër Islandës”, ka thënë Bunjaki për Express.

Kujtojmë se për këtë ndeshje Kosova do të ketë gati Besart Berishën, i cili ka marrë lejen e FIFA’s dhe pritet të luaj nga fillimi ndaj Islandës, ndërsa ende nuk ka asnjë vendim për Loret Sadikun. /Express/