Një parti e re e ngjall Kosovën

Shpresa e vetme e shpëtimit të shtetit nga kapja kriminale
Garnitura aktuale vlerësohet e dështuar

Lakmia për pushtet e liderëve aktualë dhe për përmbushjen e interesave të ndryshme grupore përreth tyre ka bërë që të humbasë përfundimisht shpresa në këtë klasë politike, pozitë apo edhe opozitë

Çarjet e mëdha që po ndodhin së fundi brenda kampit politik opozitar të Kosovës, pas anulimit të protestës dhe egos politike për të dominuar në hartimin e një liste të përbashkët për zgjedhjet e jashtëzakonshme, të cilat mund të imponohen së shpejti nga një marrëveshje gjithëpërfshirëse politike, sipas analistëve po i shkojnë për shtati mbijetesës më të gjatë të partive në pushtet.

Në këtë mjedis të thellimit të krizës brenda bllokut opozitar dhe humbjes së besimit të qytetarëve në lidershipin aktual qeverisës të PDK-së dhe LDK-së, analistët po e shohin si zgjidhje krijimin e një alternative të re politike, një parti apo lëvizje qytetare që do të demaskonte në të dyja kampet aktuale politike, pozitën dhe opozitën, e veçmas këtë të fundit, e cila po tregon se nuk mund të bashkëpunojë për një platformë të përbashkët, dhe kështu mbetet e pashpresë si alternativë për largimin e këtyre dy partive të mëdha që janë në pushtet.

Politologu Albinot Maloku i tha gazetës se ambienti politik në Kosovë është aktualisht tej mase i kontaminuar, saqë në disa raste frikshëm po e humb busullën, duke shkuar drejt një degradimi absolut./kosova sot/