Një monografi e një pune të gjatë hulumtuese

Nga Faik Sahiti – Libri i autorit Tefik Selimi, është kontribut i një pune të gjatë hulumtuese. Autori synon përfshirjen e të gjitha rezultateve të evoluimit të ngjarjeve edukative – arsimore në kontinuitet, duke përfshirë ato që nga nismat e para të Gjimnazit, sfidat, ecuritë e ngritjes së vetëdijes arsimore, për të arritur te pasqyrimi i vlerave të mirëfillta të një shkolle elitare. Tiparet pozitive të autorit qëndrojnë në përpjekjet e rrahjes tërësore të çështjeve arsimore në Gjimnaz, aq më tepër kur dihet se autori ishte pjesë përbërëse e dinamikës së ngjarjeve, sidomos nga vitet 70 – ta e këndej.

Ajo që tërheq vëmendjen më shumë është puna e pakursyer, përkushtimi, qasja pozitive e shpërfaqur në punim si dhe angazhimi serioz i autorit në rolin e kronistit për përshkrimin detal dhe përmbajtësor të aspekteve më interesante të kësaj shkolle elitare. Ndonëse autori pohon se e kishte të vështirë qasjen e trajtimit të këtij projekti të madh dhe me vlerë të veçantë, megjithatë puna shumëvjeçare edukative, mbledhja e materialit si dhe trajtimi me disa artikuj të më hershëm i punës së këtij tempulli të dijes, ishin masë lehtësuese, që në raste të caktuara relaksonte punën e autorit.

Ajo që dihet me siguri dhe që na bënë kureshtarë të gjithëve është se, monografia për Gjimnazin e Gjilanit, konsiderohet si përpjekja e parë ndër ne, tanimë e plotësuar dhe e pasuruar më tepër që të ndriçohet e kaluara e një institucioni edukativ – arsimor që kontribuoi shumë në dekada, (për 70 vite me radhë) dhe ashtu si e thotë autori, nxori: krijues, profesorë, mjekë, pedagogë, doktorë shkencash, e çka jo tjetër.

Monografia “Gjimnazi Zenel Hajdini i Gjilanit 1045 – 2015”, nisë me një parathënie në të cilën parashtrohet qëllimi dhe tematika e studimit. Punimi është i konceptuar në disa nënçështje të tjera, ku trajtohet me kujdes, sipas kronologjisë; zanafilla e punës, sfidat, diskriminimi, dhuna ndaj nxënësve dhe mësimdhënësve, segregacioni; aspekte të shëmbëlltyrave edukative; pjesë biografike, për të pasqyruar gjithashtu aspektet kulturore të të arriturave në Gjimnaz si dhe rezultatet e të nxënit dhe aktivitetet e lira.

Marrë në tërësi, monografia për Gjimnazin e autorit Tefik Selimi, paraqet një kontribut mjaft të rëndësishëm për veprimtarinë në dekada të këtij tempulli me vlerë të madhe të dijes./rajonipress/

Faik Sahiti, profesor i Gjimnazit “Zenel Hajdini” në Gjilan