Një kompani kineze padit Obaman

Pekin – Një kompani kineze ka paditur presidentin amerikan, Barack Obama, për bllokimin e një marrëveshjeje për blerjen e disa mullinjve me erë, duke pohuar se urdhri i presidentit ka tejkaluar të drejtat kushtetuese dhe Obama nuk ka dhënë dëshmi të detajuara në favor të vendimit të tij.

Presidenti Obama kishte lëshuar një urdhër të rrallë presidencialë, më 28 shtator, duke parandaluar kompaninë kineze, Ralls Corporation, që t’i blinte katër ferma me mullinj me erë në Oregon, duke përmendur rrezikun e sigurisë për shkak se aty pranë gjendet një bazë ushtarake. Ky është investimi i parë i huaj i cili bllokohet në Shtetet e Bashkuara të Amerikës në 22 vjetët e fundit.

Sipas Ralls Corporationit, presidenti amerikan “ka vepruar në mënyrë të paligjshme”, duke mos e trajtuar firmën kineze, në mënyrë të barabartë me firmat e tjera.