Një kandidate si Mrika Krasniqi Shala: E guximshme, e aftë dhe profesionale në shumë fusha

Gjilan – Mrika Krasniqi Shala pothuajse është ndër kandidatet më të përgatitura, në mesin e partive politike në Gjilan, e cila garën për asambleiste e ka bërë me dije, vizion, përkushtim dhe devotshmëri profesionale. Mrika Krasniqi Shala ka treguar zotësi në shumë sfera, duke dhënë për publikun gjilanas alternativa e ide kreative në çdo fushë e lami.

Ajo duke ofruar alternativa të shumta ka dhënë edhe mundësi për ta votuar një kandidate, aq të përgjegjshme dhe aq të interesuar për ta pasur një Gjilan, me infrastrukturë të rregulluar, hapësira urbanistike të mbrojtura, parqe e gjelbërim kudo, arsim të avancuar, kulturë të vlerave evropiane, avancimi i gruas në shoqëri, edukim i mirëfilltë familjar, rini aktive dhe të angazhuar dhe një qytet ku rendi e ligji janë prioritet.

“Gara ime ishte e sinqertë nga dita e parë dhe jam përpjekur që të fokusohem në problemet më të ndjeshme që ka Gjilani. Do të doja që qytetarët kësaj radhe të vendosin arsyeshëm dhe të përkrahin kandidatët, që kanë ofruar projekte e zgjidhje për secilin problem jetik për gjilanasit” tha Shala.

Mrika Krasniqi Shala e cila kësaj radhe garon nën llogon e PDK-së, është e bindur se një ulëse në Kuvendin Komunal të Gjilanit, do të jetë një fitore më shumë për qytetin dhe ata që e duan dhe angazhohen për një Gjilan me vlera evropiane./rajonipress/