Një jetë kushtuar gazetarisë, Bajram Kabashi sot promovon librin më të ri “Rrëfime nga Norvegjia”

Sot, në ora 12:00 në Hotelin “Grand” të Prishtinës promovohet libri i gazetarit Bajram Kabashi «Rrëfime nga Norvegjia», që në pika të shkurtra e përfshin përshkrimin e periudhës 1999-2024 në Norvegji. Abedin Sutaj në recensionin e tij ka shkruar: Bajram Kabashi është shembull i përkushtimit për gazetari, shembull i gazetarit të vetmuar pa përkrahje nga asnjë grup, pa qenë pjesë e klaneve dhe e bandave nga më të ndryshmet. Ai e ndërtoi me përkushtim të pa ndalur, hap pas hapi, pikë pas pike, me përpjekje të pashembullt dhe kryeneçe veprën dhe punën e tij madhështore.

Me librin «Rrëfime nga Norvegjia» jipet tabloja e plotë e dhunës ndaj gazetarisë së pambrojtur nga krimi i organizuar, ku bashkëpjesëmarrës në dhunë janë edhe gazetarët e rrejshëm.

Ky libër e krijon tablon e plotë të krimit në gazetari, pas rrëfimeve të hollësishme që janë brenda librit të mëhershëm për periudhën e nisur me 1 dhjetor 1982 e deri kah fundi i prillit 1999, që pasqyrohet hollësisht në librin «Rilindja, përkushtim e trishtim».

Recensenti i librit “Rrëfime nga Norvegjia” Dr. sc. Abedin Sutaj nga Vjena, pos tjerash, në një pjesëz të recensionit të tij për librin, thotë:
“Dhe, në fund, pa asnjë mëdyshje, edhe me librat tjerë të botuar më herët, edhe me këtë libër, duke marrë parasysh kushtet dhe rrethanat e vështira socio-ekonomike dhe politike, në të cilat punoi dhe veproi, e në të cilat u gjet njeriu e populli i pushtuar në përgjithësi, por edhe gazetari, në këtë rast zoti Bajram Kabashi, e bën punën e tij më të veçantë, më të përkushtuar, por edhe më të rrezikshme. Këto tipare i japin punës së tij shumëvjeçare vlerë të nivelit të lartë, përpjekjes dhe veprës së tij jetësore i jep vulën e një pune të korifeut, të pashembullt dhe madhështore. Të veprosh e të punosh si gazetar në ato kohë nuk ishte e lehtë, as sot nuk është lehtë puna e gazetarit të mirëfilltë dhe e intelektualit në këtë pjesë të Evropës. Në këto kohëra sikur nuk kemi më mendim e shprehje të lirë, por mendime e shprehje të porositura nga pagues të ndryshëm, shpesh anonimë… Natyrisht, në qoftë se ndonjëherë shkruhet historia e gazetarisë së Kosovës në rrugën e saj për pushtimin e lirisë dhe për ndërtimin e shtetit dhe të demokracisë, e shtet ndërtimit me rrugë ende të papërfunduara, për Bajram Kabashin duhet të shkruhet kapitulli më voluminoz, qendror dhe më përmbajtjesor, si shtyllë qendrore e gazetarisë së kësaj periudhe. Ai është shembull i përkushtimit për gazetari, shembull i gazetarit të vetmuar pa përkrahje nga asnjë grup, pa qenë pjesë e klaneve dhe e bandave nga më të ndryshmet. Ai e ndërtoi me përkushtim të pa ndalur, hap pas hapi, pikë pas pike, me përpjekje të pashembullt dhe kryeneçe veprën dhe punën e tij madhështore. Ai e ndërtoi veprën e vet voluminoze pa u dorëzuar, pa u ndaluar, duke mbetur yll e shembull në qiellin e kësaj fushe, duke mbetur lajmëtar e shembull për gazetarinë që duhet të vijë dhe model se si duhet të punohet në të ardhmen, ardhmëri e cila ende nuk po agon siç duhet, fatkeqësisht. Nuk është thënë kot nga populli: “Puna pa da e shem ni kala!” ka shkruar Sutaj./rajonipress/