Një i vdekur dhe dy të lënduar në autostradën “Ibrahim Rugova”

Një person ka humbur jetën si pasoj e lëndimeve të marra nga rrëzimi i një shtylle elektrike të tensionit të lartë dhe dy të tjerë janë lënduar derisa ishin duke e zhvendosur ato nga vendi nëpër të cilin do të kaloj autostrada “Ibrahim Rugova”. Ngjarja ka ndodhur sot në mbrëmje në fshatin Shkabaj.

Lajmin për lëndimin e tre personave dhe vdekjen e njërit prej tyre e ka konfirmuar për Kosovapress, zëdhënësi i Policisë së Kosovës, Baki Kelani.

“Disa punonjës të cilët kanë qenë duke punuar në zhvendosjen e shtyllave elektrike gjatë punimit një shtyllë elektrike i ka zënë disa punonjës. Dy prej këtyre kanë pësuar lëndime, ndërsa një prej tyre ka ndërruar jetë si pasoj e lëndimeve të marra. Mjeku kujdestar e ka konstatuar vdekjen e personit”, ka thënë Kelani.

Kjo nuk është hera e parë që në autostradë “Ibrahim Rugova” humbin jetën persona gjatë punimeve që po bëhen.

Vdekjen e viktimës e ka konstruar mjeku kujdestar i cili kishte dalë në vendin e ngjarjes. Njësitet përkatese të policisë kanë nisur hetimet përkitazi me rastin.