Një familje 7 anëtarësh kthehet në Kapit të Medvegjës

Në fshatin Kapit të Komunës së Medvegjës është kthyer një familje nga Fushë-Kosova. Familja 7-anëtarësh Haradini tashmë 2 javë është vendosur në shtëpinë e vet në fshatin Kapit, ndërsa tre fëmijët e kësaj familje janë regjistruar që mësimet t’i zhvillojnë në shkollën fillore “Zenel Hajdini” në Tupallë, respektivisht në paralelet e ndara në Gjylekreshtë.

Familja Haradini deri më tani është vizituar dhe i është ofruar ndihma në artikuj të ndryshëm ushqimorë nga zyrtarët komunalë të Medvegjës, si zëvendëskryetari Florim Sahiti dhe zëvendëskryetari i Kuvendit zoti Femi Beha. Familja e sapokthyer është vizituar edhe nga Këshilli i Bashkësisë Islame të Medvegjës.

Në ndërkohë, këtë familje e ka vizituar edhe kryetari i Këshillit Nacional Shqiptar, zoti Galip Beqiri, i shoqëruar nga deputeti popullor, zoti Riza Halimi. Përveç ndihmave në artikuj ushqimorë, ata premtuan përkrahje të vazhdueshme njofton medvegjanet.