Një dokument shtesë rreth angazhimit të Mulla Idris Gjilanit, në mbrojtjen e kufirit të Kosovës Lindore

Nga Aliriza Selmani – Se Mulla Idrisi ishte frymëzues i rrallë në ngritjen e masës në luftë për liri, flet edhe dokumenti të cilin kohët e fundit patëm rastin që ta kemi në dorë. Dokumenti është një shkresë e shkruar nga ana e Nënprefektit të Nënprefekturës së Gjilanit Hamit Kroj, me nr. Res. 30/94, të datës 6.10. 1944, drejtuar Kryemyftinisë në Prishtinë, ku bëhet fjalë, lidhur me shërbimet patriotike të Nënmyftiut të Gjilanit Mulla Idris Gjilanit, me kërkesë që t`i vazhdohet qëndrimi I mëtejmë I tij, në mbrojtje të kufirit të Kosovës Lindore.

Në shkresën e tij Nënprefekti Hamit Kroj, përkujton Kryemyftininë për luftën në këtë pjesë të Kosovës dhe për sulmet e pareshtura të forcave partizano-çetnike në vijën kufitare, përpjekjet e tyre që në çdo mënyrë ta ripushtojnë vendin tone dhe të përsëritin veprimet e tyre të zakonshme që ky vend ka pasur fatin e keq që të shoh dhe të pësojë prej 30 vjetësh me radhe.

Në luftimet e bëra në këtë rajon midis “lakmuesve fqinjë” dhe popullatës shqiptare ku siç, përkujton nënprefekti, si data më të shënuara të kësaj lufte ishin, ato të 26 – 27 korrik dhe 11-12 dhe 18 – 19 shtator 1944, dy të parat në rajonin e Komunës së Hogoshtit dhe dy të fundit në atë të Preshevës dhe Bujanocit. Për të shtuar, se edhe në këto çaste kritike, përkundër mos përgatitjet e duhura për tu mbrojtur kufiri, nuk mungonte gatishmëria e popullatës shqiptare të kësaj ane siç thuhej, ”… me armë e pa armë të vrapojë aty ku nderi dhe atdheu e kërkonte”. Në këtë çaste të rrezikshme për vendin, Nënprefekti, kujton autoritetin e lartë të Mulla Idrisit në popull, duke thënë se “Në mes të kësaj mase, duke e pa nevojën e rrezikun që e kërcënonte vendin, shihet në krye të turmës si flamurtar Nënmyftiu i Gjilanit Z. Idriz Hajrullahi (Mulla Idris Gjilani-AS), i cili pos që merr pjesë edhe vet në këto luftime, që ishte një sakrificë personalë, por është simbol I vetëm në këtë rejon që ka mundur të shtojë kurajën popullit dhe të ndiqet prej të gjithëve pa përjashtim, duke fituar një simpati si e admirim si prej kreshnikëve ashtu edhe vullnetarëve”.
Nisur nga shërbimet atdhetare të Mulla Idriz Gjilanit, i cili është personi i cili shton kurajën e luftëtarëve, e ngritë moralin e tyre nënprefekti, në emër të nënprefekturës, lutet që leja e akorduar prej asaj kryemyftinie me nr. 559/ dt. 9.08/44 prej 20 ditësh, nisur nga arsyetimet e mësipërme ti vazhdohet për një kohë të pacaktuar…
/Prefekti, Hamit Kroj.
Vula e rrumbullaket me tekstin Prefektura-Gjilan dhe shqiponjën dhe krenarën e Skënderbeut.

Shpërndaje.
© RAJONIPRESS