Nitaj: Haradinaj përcolli mesazhet e opozitës edhe në qarqet ndërkombëtare

Anëtari i Kryesisë së AAK’së, Muharrem Nitaj, thotë se kreu i kësaj partie, Ramush Haradinaj, tregoi se është një politikan i përgjegjshëm, duke marrë pjesë në takimin me Presidenten.

Ai këtë e sheh si një “përcjellje të mesazhit të opozitës edhe në qarqet ndërkombëtare”.

Nitaj thotë se Haradinaj i bëri të qarta kërkesat e opozitës: të shpërbëhet Parlamenti dhe presidenti të zgjedhet me votë të drejtpërdrejtë.
Postimi i plotë i Nitajt në Facebook:

Sfida e radhës e Haradinajt

Pse prania e sotme e Ramush Haradinajt në tryezën e Presidentes duhet parë si një gjest të vullnetit të mirë, i një politikani të përgjegjshëm, që i futet një beteje, i ndërgjegjshëm se shteti po rrëshqet në shpërbërje!
A mund të flitet se pesë minutat e tij në atë takim, ku thuhet se vendi është kapur nga dy parti e nga dy njerëz, ku thuhet se korrupsioni po mbërrin majat, ku thuhet se drejtësia është e korruptuar dhe e kontrolluar, ku sistemi i sigurisë nuk është i përmbyllur, dhe ku njerëzit përballë e kanë shkelur kushtetutën dhe duhet të shkojnë, është dëmtim çfarëdo kauze!?

Unë besoj se vetizolimi i përfaqësuesve të kësaj kauze është dëmtim i kauzës e jo takimet ballpërballë.
Kauza e drejt e Opozitës duhet të depërtojë edhe në disa qarqe të tjera, kryesisht ndërkombëtare, të cilat nuk jam shumë i sigurt, që e kanë kuptuar krejt kompleksitetin e krizës institucionale e politike në Kosovë.

Haradinaj sot në këtë tryezë, ku ishin të pranishëm edhe përfaqësuesit e SHBA-së dhe të BE-së, bëri një ofertë për një marrëveshje politike për të dalë vendi nga kriza. Dhe tashmë kjo ofertë është e formësuar dhe mund të përmblidhet në një fjali:” Të shpërndahet parlamenti, të shpallen zgjedhjet e parakohshme dhe presidenti të zgjedhet me votë popullore”!

Ai sot e bëri një gjest të politikanit të përgjegjshëm për vendin e tij.
Se mos është hera e parë!