NISMA: Opozita mund të shkojë veç e veç te Presidentja

Sekretari i Nismas për Kosovën Bilall Sherifi ka thënë për Klan Kosovën se në takimin e sotshëm të opozitës përveç organizimit të protestës së 17 shkurtit është diskutuar edhe për takimin e thirrur nga Presidentja Jahjaga.

Sherifi ka thënë se këtë takim nuk mund ta trajtojnë të njëjtë sikur të herave të tjera ku thirrej opozita, pasi që tash aty do të jenë të gjitha partitë politike.

Për këtë takim ai ka theksuar se partitë opozitare mund të vendosin që të shkojnë edhe ndaras dhe jo si bllok.

Më tej Sherifi ka thënë se konsiderojnë që ky takim është i thirrur me vonesë dhe në anën tjetër ata tash do të pranonin që të diskutonin vetëm për rrugën e caktimit të zgjedhjeve të ardhshme.

Ai po ashtu ka deklaruar se mendësia e ish-ministrit Jabllanoviq ende gjendet në këtë qeveri, pasi që kryeministri Mustafa i ka quajtur protestuesit ulëritës, ashtu si Jabllanoviq i kishte quajtur nënat gjakovare egërsira, njofton Klan Kosova.