Nisin kritikat drejt Shaqirit: “Po shkon në MLS për para”

Xherdan Shaqiri do të largohet nga Lyon me dëshirën e tij për t’u transferuar në MLS.

Kështu është duke u spekuluar tash e disa ditë dhe pretendohet se lojtari ka arritur marrëveshje me Chicago Fire, ku do të fitonte dyfishin e asaj që fiton te Lyon.

Sido që të jetë, në Zvicër nuk e kanë pritur aspak mirë këtë vendim të Shaqirit, i cili megjithatë, ende nuk është zyrtar.

Arno Rossini, një trajner me përvojë të madhe dhe i shumë klubeve në Zvicër, ka folur për këtë çështje shumë i irrituar.

“Në moshën 30-vjeçare, Shaqiri ende mund të luante për një kohë të gjatë duke veshur fanellën e Zvicrës. Por me transferimin e tij në Shtetet e Bashkuara të Amerikës, do të kalonte në plan të dytë për një vend titullari në kombëtare. Ai do të vinte gjithmonë me vonesë nga Amerika për t’u grumbulluar me kombëtaren e tij. Shaqiri gjithmonë ka qenë lojtari më i rëndësishëm i Zvicrës, por tani ai po e braktis për disa para më shumë në fund të sezonit”, tha ai.

“Shaqiri ka luajtur në klube të mëdha si Inter, Bayern Munich dhe Liverpool, por kurrë nuk ka pasur merita kur klubet fitonin trofe”, është shprehur i irrituar Rossini. /Gazeta Express/