Nisi Flaka e Janarit…

Gjilan – “Flaka e Janarit” ka nisur të shtunën me homazhe tek varrezat e dëshmorëve dhe tek lapidarët në qytet. Lutfi Haziri tha se Flaka paraqet një vlerë të madhe për Kosovën e Anamoravën.

“Flaka e Janarit” ka nisur me homazhe tek varrezat e dëshmorëve. Ishin të gjitha institucionet, partitë politike, shoqatat e dalura nga lufta, familjarët e dëshmorëve që vunë lule mbi varret e tyre.

Lutfi Haziri i shoqëruar nga drejtor e zyrtar komunal ka vënë kurora lulesh derisa tha se Flaka paraqet njërin nga Manifestimet më të ndritura dhe më domethënëse për Gjilanin dhe Anamoravën. “Ne ndihemi krenar për veprat dhe përkushtimin e këtyre heronjve që dhanë gjithçka nga vetja që sot ne të frymojmë lirshëm. Unë do kujdesem në mënyrë institucionale që këto veprimtari e aktivitete të kenë vendin merituar” tha Haziri.

Kurora kanë vendosur edhe Ahmet Isufi i shporuar nga Rexhep Kadriu, Hydajet Hyseni, Mehmet Hajrizi , Ilmi Ramadani, e të burgosur tjerë politikë. Edhe Qemajl Mustafa ish kryetar i komunës së bashku me Izmi Zekën dhe ekipin e PDK-së vendosën kurora lulesh.

Ishte Avni Rudaku nga Vetëvendosje që ka vendosur lule së bashku me aktivistët e tjerë.

Ahmet Isufi ish komandant i Zonës Operative të Karadakut tha se kjo ditë është e madhe dhe e veçantë sepse nga këtu dhe nga këta emra të lirisë nisë edhe kushtrimi për luftën heroike e çlirimtare. “Ishin Rexhep Mala e Nuhi Berisha e Kadri Zeka ata që e dhanë kushtrimin për të vazhduar me gjeneratat e reja. Është ditë dhembje, por edhe krenarie” tha Isufi .

Isufi tha se duhet të punojmë më shumë sepse familjet e dëshmorëve meritojnë një përkujdesje më të madhe institucionale.

Ahmet Daku nga shoqatat e veteranëve të luftës tha se me pietet të madh i përkujtojnë dëshmorët dhe të rënët e luftës për liri./rajonipress/