Nishani: Isa Boletini ishte krenaria shqiptare në orët më tragjike të shqiptarisë

Historia mëson prej vullnetit dhe kujtesës së një populli, ka thënë presidenti i Shqipërisë, Bujar Nishani, në ceremoninë e rivarrimit të heroit kombëtar Isa Boletini.“Sot ajo rishkruhet duke përmbyllur rrugëtimin e heroit Isa Boletini, frymëzuesi i lirisë kthehet përgjithmonë në Kosovën e sotme të pavarur. Isa Boletini ishte krenaria shqiptare në orët më tragjike të shqiptarisë”, ka thënë Nishani, transmeton Arta TV.

Në këtë manifestim kanë folur edhe kryetari i Kuvendit të Kosovës dhe kryetari i Komunës së Mitrovicës.

Ceremonia qendrore është mbajtur në prani të shumë qytetarëve të mbledhur në stadiumin e Mitrovicës, ndërsa paraprakisht janë bërë homazhe në qytet.

Pas fjalimeve dhe programit artistik, eshtrat e heroit kombëtar do të dërgohen në vendlindjen e tij, në Boletin.

Dje, gjatë ditës, Kuvendi i Kosovës ka mbajtur një seancë solemne, ku është folur për figurën e heroit Isa Boletini.