Nishani: Interesi partizan dominon ndaj atij kombëtar

I pakënaqur me nivelin e bashkëpunimit ndërmjet Shqipërisë dhe Kosovës është shprehur presidenti Bujar Nishani. Ai ka shtruar nevojën për më pak retorikë e për më shumë punë.

Në pjesën e dytë të intervistës dhënë “Kohës Ditore”, kreu i shtetit shqiptar e ka quajtur krejt të paarsyetuar nivelin e bashkëpunimit në aspektin ekonomik, por edhe në atë kulturor dhe shkencor. Ka përmendur një numër ngecjesh. Ka thënë se ato vijnë kryesisht për shkak se tek pushtetarët e të dyja anëve të kufirit dominon interesi politik ndaj atij kombëtar.

Në vijim të kësaj e ka quajtur të paarsyeshëm edhe debatin që pati ndezur përcaktimi i të dyja qeverive për t’i varrosur eshtrat e Isa Boletinit në Vlorë dhe jo në vendlindjen e këtij themeluesi të shtetit shqiptar, në Boletin të Kosovës, por i cili vendim u shfuqizua pas reagimeve në masë. Ai ka thënë se duhet ruajtur simbolikat, të cilat janë pjesë treguese e ekzistencës së shqiptarëve dhe e qenësisë së tyre, dhe se, në këtë kuptim, edhe Isa Boletini duhet lënë të prehet atje ku është lindur.

Në këtë intervistë presidenti Nishani ka folur edhe për veriun e Kosovës, term për të cilin ka thënë se nuk duhet të përdoret si referencë politike. Sipas tij, do të jetë shumë e padrejtë dhe e rrezikshme edhe për të ardhmen e vetë zhvillimit të kësaj zone, nëse konvertohen nocionet gjeografike në nocione politike. Ka dhënë një qëndrim edhe për negociatat me Kosovë-Serbi dhe ka përmendur një kërkesë që ia ka shtruar kryeministrit serb, Vuçiq, javën e shkuar.

http://koha.net/?id=27&l=61079