Nis sezoni turistik, aktivizohen maskat në autostradë

Maskat grabitëse janë riaktivizuar, në fillimin e sezonit turistik, pikërisht në rrugën nga ku qarkullojnë më shumë vizitorët për në Shqipëri, shrkuan sot “Koha Ditore”.

Në aksin rrugor Milot-Kukës-Morin janë regjistruar dy grabitje me maska brenda 48 orësh, ku viktimë kësaj radhe kanë qenë një autogrill në afërsi të Repsit dhe një drejtues automjeti nga Tirana në Fushë-Milot.

Bilanci i këtyre grabitjeve ka qenë xhiroja ditore e pikës së shpërndarjes së karburantit në autogrill dhe një automjet “Mercedes” dhe 10 mijë lekë i qytetarit nga Tirana. Policia e cila ka shkuar në vendin e ngjarjes nuk ka mundur të arrestojë apo të identifikojë autorët e grabitjes me maska në pikën e karburantit në Reps, por ka shoqëruar në policinë e Lezhës një të dyshuar si autor të grabitjes së “Mercedesit”.

I dyshuari është punonjës i policisë së burgjeve në burgun e Shënkollit në Lezhë.