Nis rritja e çmimeve të konsumit

Çmimet e konsumit kanë nisur të rriten ende pa i marrë pagat me ngritje punëtorët e sektorit publik, shkruan sot “Koha Ditore”.

Disa tregtarë kanë nisur t’i shtrenjtojnë disa nga artikujt qëkur është vendosur për rritje të pagave. Ngritja e çmimit vërehet kryesisht tek dyqanet e vogla.

Ngritje e çmimeve është vërejtur tek mielli, vaji, orizi, qumështi e vezët. Por ka ngritje të çmimeve edhe për artikujt e tjerë. Kjo ngritje është vërejtur kryesisht gjatë muajit të fundit.

Tregtarët e demantojnë kryeministrin Hashim Thaçi, i cili nëpërmjet një deklarate ka argumentuar se pse nuk do të ketë ngritje të çmimeve për shkak të rritjes së pagave në sektorin publik. Rritja e çmimeve ishte evidencuar edhe në vitin 2011, kur ishte bërë rritja e fundit e pagave. Atëbotë çmimet ishin shtrenjtuar për rreth 7,3 për qind, që ishte shkalla më e lartë e inflacionit e shënuar viteve të fundit.