Nis fushata, nisin akuzat

Lideri i PDK-së, Kadri Veseli, nuk ka kursyer akuzat për rivalët e tij politikë nga lëvizja “Vetëvendosje” në ditën e parë të fushatës të koalicionit PDK-AAK-“Nisma” të mërkurën, në sheshin “Skënderbeu”, në Prishtinë.

Ai me këtë rast u ka bërë thirrje qytetarëve që të mos votojnë ata që nuk e njohin shtetin dhe flamurin e vet.

“Nuk e njeh shtetin e Kosovës, nuk e njeh flamurin tonë, nuk e njeh partneritetin me SHBA-në. Ju nuk duhet t’ia lejoni këtë. Kosovës i duhet një lidership i fortë. Një lidership që mban lart flamurin kombëtar, por të lartësuar edhe flamurin e shtetit tonë. Një lidership që nuk bën dallime te qytetarët në bazë të përkatësisë etnike”, ka thënë Veseli, shkruan sot Gazeta “Zëri”.

Me akuza i është kundërpërgjigjur Kadri Veselit, Ramush Haradinajt dhe Avdullah Hotit edhe kreu i “Vetëvendosjes”, Visar Ymeri.

“Adullah Hoti premton buxhet prej pesë miliardë eurosh, çka nuk është e mundur. E ky tjetri, Ramush Haradinaj i shpalli edhe Konicën, edhe vëllezërit Frashëri priftërinj. Ndërsa Kadri Veseli luan lojëra me bateria”, ka thënë Ymeri.

Ymeri në hapjen e fushatës zyrtare në Gjilan ka thënë se klani “Pronto” e ka futur vendin në një krizë të thellë.

Ndërsa presidenti i AKR-së, Behgjet Pacolli, në hapjen zyrtare të fushatës zgjedhore të koalicionit LDK-AKR-Alternativa në Podujevë, ka thënë se ky koalicion është koalicion i shpresës dhe i punës, përderisa koalicioni tjetër PDK-AAK-“Nisma” është koalicion i mjegullës, i cili po dëshiron të krijojë mjegull tek qytetarët.

Profesori për marrëdhëniet ndërkombëtare, integrimet evropiane dhe studimet e Evropës, Dashnim Ismajli, ka thënë për “Zërin” se po vërehet haptas një tendencë dhe gatishmëri nga ana e partive politike në Kosovë për rritjen e volumit të zërit dhe ashpërsimin e gjuhës për të sulmuar konkurrentin e saj.