Ngritja e çmimeve destabilizon në radhë të parë familjet sociale në Gjilan

Gjilan – Qytetarët e të gjitha kategorive ndihen të shqetësuar me ngritjen e çmimeve dhe me idiotizmin që kanë treguar këto ditë bizneset mafioze. Albin Kurti duhet me reague herave tjera me kohë, sepse e shkatërron një popull kështu shprehet Samiri.

Ngritja e çmimeve përnjëherë ka destabilizuar familjet sociale të cilat mezi ia dalin muajin me paga të limituara e disa besa edhe pa asnjë euro në xhep të ardhura.

Bislimi një 56 vjeçar thotë se ka 9 anëtarë të familjes dhe për të është e pamundur të jetohet me këto çmime. “Valla e përjetova rëndë dhe me shumë siklet ngritjen e çmimeve. Kur e pasha një litër vaj 3.49 për mua ishte vdekje” shprehet ky qytetar.

Samiri që thotë se ka 12 anëtar të familjes thotë se Albin Kurti u vonua kësaj radhe me reagimin e tij në teren. “Kurti duhej më herët të reagonte sepse kështu e shkatërron një popull dhe e merr në qafë sepse tregtarët janë matrapaz dhe se ata në kohë turbullirash shfrytëzojnë momentin” tha Samiri.

Lindita një studente e ekonomikut thotë se këto çmime ishin një sulm për shtresën e mesme dhe ato sociale, por edhe familjet me buxhet të mirë nuk e përballojnë dot këtë fluks të çmimeve të panjohur ndonjëherë.

Shumë qytetarë ndërkaq thonë se është interesante se si populli në Kosovë është i heshtur kur i shkelen të drejtat e tyre dhe nuk protestohet fare, siç po veprohet në Shqipëri, ku shoqëria civile dhe qytetarët janë shumë më aktiv./rajonipress/