KKGJILAN

Ngopen me dhunë

/ 5 minuta lexim

Aktivistët e Lëvizjes Vetëvendosje u mblodhën sërish në Shesh. Policia i vëzhgoi nga ndërtesa e Qeverisë, nuk ndërhyri fare, e as protestuesit nuk i gjuajtën ata me gurë. Kryeministri Hashim Thaçi e quajti Albin Kurtin nxitës të dhunës dhe njeri që po përpiqet t’i zhvendosë në rrugë humbjet që po i pëson në Parlament.

Ashtu siç paralajmëruan një ditë më parë, u mblodhën sërish.

Caku ishte i njëjtë- Qeveria e Kosovës. Por, kësaj radhe aktivistët e Vetëvendosjes së Albin Kurtit nuk tentuan ta pengojnë punën e qeveritarëve.

Qëllimi i tyre të martën ishte ekspozimi i fanellave me emrat e të arrestuarve në rrethojën e ndërtesës së ekzekutivit, gjë që u bë pa asnjë pengesë.

Përkrah Kurtit u panë qindra aktivistë e qytetarë, ndër ta edhe deputetët e lënduar në protesta Visar Ymeri, Liburn Aliu dhe Albulena Haxhiu.

Emrat e 63 të arrestuarve të së hënës u lexuan më zë para turmës, e cila kërkonte lirimin e tyre.

Por, kjo kërkesë vështirë të realizohet para ditës së mërkurë, kur pritet të kalojnë edhe 48 orët e masës së ndalimit policor që ishte shqiptuar të hënën.

Policia këtë masë e ka arsyetuar me pengimin e personit në detyrën zyrtare duke u thirrur në rezistencën e protestuesve ndaj policëve, të cilët nuk kursyen as gazin lotsjellës e as shkopinjtë e gomës.

Këtij intervenimi, që u cilësua i dhunshëm, një përgjigje i dha Albin Kurti.

Sipas tij, policët nuk vepruan me dëshirë kundër protestuesve, por duke zbatuar urdhrat e Kryeministrit Hashim Thaçi dhe ministrit të tij Bajram Rexhepi. Atyre ua drejtoi edhe një porosi. ”Ne ju bëjmë thirrje gjithë policëve të Kosovës të organizohen në sindikatën e tyre dhe t’i dërgojnë letër shefit të policisë, ministrit të Brendshëm, kryeministrit, që të mos i mbërthejnë kundër Vetëvendosjes, por kundër korrupsionit, kundër kriminelëve dhe kundër strukturave ilegale të Serbisë”, tha Kurti.

Uji Dea

“Këta njerëz dje kanë zbatuar urdhrat e Qeverisë, të një qeverie të dhunshme, e cila shtetin e Kosovës po e bën shtet policor. Ne jemi kundër shtetit policor dhe për Republikën e Kosovës”, shtoi Lideri i Vetëvendosjes.

Por Kryeministri, të cilin Kurti e akuzoi për urdhra të kundërligjshëm, të martën tha se është i tronditur nga pamjet e protestës së një dite më parë.

Kryeministri Thaçi e ftoi Liderin e Vetëvendosjes të mos e zhvendosë debatin nga Parlamenti në rrugë.

“Jam thellësisht i tronditur nga pamjet e djeshme në kryeqytetin tonë. 13 vjet pas çlirimit të Kosovës dhe pesë vjet pas bërjes së Kosovës shtet i pavarur dhe sovran asnjëherë nuk kam menduar që sheshi i kryeqytetit tonë do të ishte arenë e pamjeve të tilla rrëqethëse. Protestues të lënduar, policë të lënduar, deputetë të lënduar…”, ka thënë Thaçi.

“Unë ftoj sot publikisht kryetarin e Vetëvendosjes që debatin e humbur në Parlamentin e Kosovës të mos e zhvendosë në rrugë, që idetë dialoguese të mos i zëvendësojë në veprime të dhunshme. Betejat e humbura në Parlament nuk mund dhe nuk duhet të zhvendosen në rrugë, kjo nuk është demokraci dhe veprimet e tilla e rrezikojnë lirinë tonë. E ftoj liderin e Vetëvendosjes që të jetë i përgjegjshëm politikisht dhe t’ i ndalojë manipulimet me qytetarë, të ndërpresë njollosjen e Policisë së Kosovës dhe institucioneve të rendit”, ka shtuar kreu i ekzekutivit.

Këto deklarata i ka përqeshur deputetit të VV’së Rexhep Selimi.

“Doli sot në një konferencë kreu i Qeverisë, doli Kryeministri dhe iu drejtua popullit sikur dikur Xhavit Nimani në vitin 1981, po as në vitin 1981 as në vitin 1998 e as në vitin 2012, populli nuk merr vesh nga këta njerëz. Populli nuk i merr vesh këta, sepse populli merr vesh të drejtën e tij për vetëvendosje”, tha Selimi.

Madje, ia përmendi edhe bashkëpunëtorët e tij të luftës, të cilët u vunë nën pranga të hënën, duke ia kërkuar lirimin e të arrestuarit Gani Krasniqi.

“Hashim, liroje Bacën Gani se baca Gani është ai që e ka mbajt me bukë Ushtrinë Çlirimtare të Kosovës, baca Gani është ai që ka dhënë djalin dëshmor për lirinë e kombit e do ta bënte këtë kurdo që kërkohet…”, tha Selimi.

Ndryshe, Gani Krasniqi dhe 62 aktivistë të tjerë ishin arrestuar të hënën nga Njësia Speciale e Kosovës, pas intervenimit që kjo pati për pengimin e arritjes së aktivistëve të VV’së deri të ndërtesa e Qeverisë. Të martën u panë vetëm dhjetëra policë të rendit përreth objektit të ekzekutivit. Ndërsa protesta përfundoi e qetë pas dy orësh.(express)