Ngjarje të pareshtura për trashëgiminë kulturore në Gjilan

Gjilan – Pas fillimit të seminarit për Trashëgiminë Kulturore, takimit të një delegacioni të komunave të Europës me kryetarin Haziri, sonte në Galerinë e qytetit të Gjilanit është hapur ekspozita me 30 fotografi të 13 studentëve amatorë të disa fakulteteve të Universitetit “Hasan Prishtina”, e cila pasqyron trashëgiminë kulturore të Kosovës, projekt ky i organizuar nga OSBE.

Drejtori i OSBE-së në Gjilan, Ulrich Biffar, tha se secila nga 30 fotografitë e përzgjedhura me anë të një konkursi publik meriton vlerësim, duke shtuar se arsyeja që kanë zgjedhur që t’i ekspozojnë nëpër komuna të Kosovës është që të ketë përkrahje edhe nga pushteti lokal për këtë sferë.

Lutfi Haziri, kryetar i Komunës, tha se sot Gjilani është qendër e trashëgimisë kulturore, duke ndarë përvojat më të mira me njërën nga komunat e Francës dhe të Maqedonisë, duke shtuar se trashëgimia kulturore i takon mbarë njerëzimit.

“Le ta kuptojmë se trashëgimia kulturore i takon njerëzimit dhe nuk i takon asnjë grupi, etnie apo religjioni. Është vlerë që paraardhësit tanë e kanë lënë për ne dhe natyrisht që duhet jo vetëm ta ruajmë dhe restaurojmë, por edhe ta zbulojmë”, tha kryetari Haziri.
Kjo është ekspozita e katërt e kësaj natyre e cila po mbahet në Gjilan me organizim të OSBE-së dhe do të qëndroj e hapur deri të premten./rajonipress/