Ngërçi po mbetet ngërç: Çka pastaj!?

Në mungesë të një mekanizmi tjetër ligjor dhe kushtetues që të bëj një hap para drejt zhbllokimit të krizës politike, vendimi i liderëve të partive të koalicionit pas zgjedhor për heqje dorë nga pretendimi për postin e kryetarit të Kuvendit të Kosovës, ka qenë i logjikshëm sipas njohësve të zhvillimeve politike në vend, por që nuk është edhe hapi qenësor për zgjidhjen e ngërçit politik në vend. Ata thonë se Partia Demokratike e Kosovës nuk do të heq dorë nga formimi i qeverisë së re ose – në të kundërtën – vendi do të shkojë drejt zgjedhjeve të reja, të jashtëzakonshme.

Dren Doli nga Instituti për Studime Juridike e Politike, duke folur për Radion Evropa e Lirë, tha se edhe pas zgjedhjes së kryetarit të Kuvendit, është legjitime që Partia Demokratike e Kosovës, si parti me më së shumti vota të fituara në zgjedhje, t’ju bëj ftesë partnerëve tjerë në Kuvendin e Kosovës dhe të kërkojë që të bëjnë koalicion qeverisës me të. Por, mbetet tek partitë tjera nëse dëshirojnë ta bëjnë një gjë të tillë. E, bazuar në disponimin e deritashëm, kjo vështirë se mund të ndodhë.

Doli shtoi se në se partitë tjera nuk zgjedhin që të jenë pjesë e një koalicioni ku PDK do të përfshihej, dhe nëse refuzojnë një kandidat për mandatar për formimin e qeverisë që rrjedh nga PDK, atëherë për herën e dytë presidentja e Kosovës do të mund të përdor masën e diskrecionit dhe të shikojë nëse lideri i propozuar për mandatar nga një grup deputetësh të caktuar, ka apo mund të marrë mbështetjen e shumicës së deputetëve të Kuvendit të Kosovës.

Analisti i çështjeve politike, Halil Matoshi, vlerëson se heqja dorë e liderëve të partive të koalicionit paszgjedhor nga pretendimi për postin e kryetarit të Kuvendit të Kosovës, nuk do ta josh PDK-në dhe liderin e saj Hashim Thaçi, që të pajtohen të mos jenë pjesë e qeverisë së re.

“Problemi është që PDK-së i intereson vetëm Qeveria dhe kurrsesi kryetari i Kuvendit. Unë mendoj se nëse presidentja e Kosovës – ose edhe me presion ndërkombëtar – nuk e thërret seancën konstituive, Thaçi përmes Flora Brovinës nuk do ta thërras asnjëherë vazhdimin e kësaj seance. Situata do të mbetet e njëjtë: bllokadë totale e krizë institucionale”, ka theksuar Matoshi.

Edhe Doli shpreh mendimin se ekziston mundësia e bllokimit edhe më tej e konstituimit e tërësishëm të Kuvendit si dhe e qeverisë së re. Sipas tij, ekziston mundësia që Partia Demokratike e Kosovës të refuzojë që të sjellë përpara deputetëve një emër për kryetar të Kuvendit, duke e ditur që ky është mjeti i fundit kushtetues. Në këtë mënyrë, ai do t’i bëjë presion publikut, partive tjera politike, por edhe presidentes, që PDK të jetë pjesë e një koalicioni qeverisës.

Ndryshe, njohësit e zhvillimeve politike në vend kanë theksuar se nëse ngërçi politik nuk gjen zgjidhjen e menjëhershme dhe vazhdon edhe për një ose dy muaj në gjendjen e njëjtë, atëherë me marrëveshje politike të partive parlamentare do të shkohet në zgjedhje të jashtëzakonshme. /REL/