Kamenicë – Gjatë shpjegimit të temave të ndryshme nga mësueset/mësuesit në klasë, nxënësit janë shpesh kuriozë që gjërat t’i shohin edhe në praktikë. Shi për këtë mësuesja e ShFMU “Metush Krasniqi” nga Rogana, Bilka Kryeziu, kohëve të fundit, në programin e saj mësimor, ka paraparë edhe vizita të ndryshme korporatave dhe institucioneve të ndryshme në fshat, komunë dhe rajon.
Kohë më parë, me nxënësit e saj, kishte vizituar Bibliotekën e qytetit dhe Muzeun në Gjilan, korporatën “Fluidi”, “Kabi”, etj. Sot, sipas programit të saj, bashkë edhe me kolegen Emi Rufati-Thaqi vizituan Qendrën e Mjekësisë Familjare në Roganë. Për funksionimin e kësaj qendre nxënësve u foli Dr. Fahredin Kryeziu, ndërkohë që nxënësit vizituan edhe dhomën e laboratorit, të sterilizatorit, të dentistit, të administratës etj.
Gjatë gjithë kohës nxënësit u njoftuan më për së afërmi me aktivitetet e këtij institucioni mjekësor, ndërkohë që mësuesja Emi u vu në dispozicion të një veprimi praktik ku nxënësit panë se si laborantja Mejreme Murtaj mori gjakun nga gishti i saj për ta ekzaminuar më pas në laborator.
Nga reagimi i nxënësve shihej se si ata ishin të ngazëllyer me këtë mësim praktik për mjekësinë familjare, por të bindur se aktivitete të ngjashme mësuesja e tyre do t’u mundësojë edhe në të ardhmen. Ky aktivitet dhe kjo formë e bashkëpunimit e mësueses Bilka me institucione të ndryshme duhet të jetë model edhe për mësuesit tjerë./xhevdet kallaba/rajonipress/
