Nga nxënës në lider akademik: Rektori Edmond Hajrizi nderon shkollën ku nisi rrugëtimin e tij në 100-vjetorin e SHFMU “Emin Duraku”

Rektori i UBT-së, Prof. Dr. Edmond Hajrizi, mori pjesë në manifestimin solemn me rastin e shënimit të 100-vjetorit të themelimit të SHFMU “Emin Duraku” në Banullë, një nga institucionet më të rëndësishme arsimore që për një shekull ka qenë vatër e dijes, edukimit dhe formimit të brezave të shumtë.

Për Rektorin Hajrizi, kjo ngjarje përfaqësoi një rikthim të veçantë dhe thellësisht emocional në vendin ku hodhi hapat e parë të arsimit dhe ku nisi rrugëtimi i tij drejt suksesit akademik dhe profesional. Rikthimi në bankat e kësaj shkolle, e cila shënoi fillimet e tij si nxënës, u shndërrua në një moment reflektimi, mirënjohjeje dhe respekti për institucionin që kontribuoi në formimin e tij.

Sot, Prof. Dr. Edmond Hajrizi vlerësohet gjerësisht si një nga figurat më të përgatitura akademikisht në vend për udhëheqjen e një institucioni universitar si UBT, duke përfaqësuar një lidership modern dhe shumëdimensional.

Ai konsiderohet një lider në disa fusha njëkohësisht dhe një inovator i cili ka kontribuar në transformimin dhe avancimin e arsimit dhe inovacionit në Kosovë, duke lënë gjurmë të rëndësishme në zhvillimin akademik dhe institucional të vendit.

Lidhja e familjes Hajrizi me këtë shkollë e bën këtë histori edhe më domethënëse për arsimin shqip. Babai i Rektorit, veterani i arsimit Bislim Hajrizi, ka një kontribut të veçantë në këtë institucion, ku fillimisht ishte nxënës, e më pas u kthye si mësimdhënës i përkushtuar për dekada të tëra.

Si mësues i gjuhës shqipe, ai u dallua për angazhimin e tij të jashtëzakonshëm në ruajtjen dhe kultivimin e gjuhës amtare, duke kontribuar në edukimin e brezave të tërë në periudha sfiduese për arsimin në vend. Për vite me radhë, ai shërbeu jo vetëm si mësimdhënës, por edhe si një figurë udhëheqëse dhe mbështetëse e zhvillimit të shkollës, duke forcuar rolin e saj si një nga institucionet kyçe të arsimit në zonë.

Manifestimi jubilar mblodhi përfaqësues institucionalë, drejtues të arsimit, mësimdhënës, ish-nxënës, prindër dhe qytetarë të shumtë, të cilët nderuan historinë njëqindvjeçare të shkollës dhe kontributin e saj të çmuar në zhvillimin e arsimit në Komunën e Lipjanit.

Gjatë ceremonisë u vlerësua roli i SHFMU “Emin Duraku” si një shtyllë e fortë e dijes ndër dekada, ndërsa u kujtuan me respekt mësimdhënësit që me përkushtimin e tyre kanë mbajtur gjallë frymën e arsimit dhe kanë edukuar breza të tërë, duke ndërtuar themelet e së ardhmes së komunitetit dhe vendit.