Nga një muaj arrest shtëpiak për tre tifoz të Dritës

Gjilan- Gjykatësi i procedurës paraprake Abdullah Ahmeti tha për rajonipress se u ka caktuar masën e arrestit shtëpiak prej një muaji Agim Isufit, Ardian Matoshit, dhe Faik Vokshit. Gjykatësi Ahmeti tha se këta tre dyshohen për veprën penale “Shkaktimi i rrezikut të përgjithshëm”.

Ahmeti tha se kjo masë pak më e butë është ndërmarrë duke pasur parasysh se të dyshuarit ishin nxënës të shkollave të mesme, derisa njëri kishte probleme shëndetësore. Por kjo masë nuk është zbatuar edhe për Gëzim Vitin e Erkan Mustafën të cilët kanë marrë nga një muaj paraburgim.

Sipas aktvendimit për zhvillimin e hetimeve Gëzim Vitia dhe Erkan Mustafa dyshohen se më 11 nëntor rreth orës 15 e 55 minuta në bashkëveprim edhe me disa persona të tjerë, pas përfundimit të ndeshjes futbollistike në mes të Dritës dhe Llamkosit të Vushtrrisë, kanë shkaktuar dëm thelbësor material, ashtu që i godasin me mjete të forta dy autobusët me tabela të Prishtinës, duke ua shpërthyer gomat dhe duke ia thyer dëmtuar xhamat dhe karrocerinë, ku më pas i godasin me mjete të forta dhe i shkaktojnë lëndime të rënda trupore shoferëve të autobusëve të dëmtuarve Fadil Azemi dhe Mahmut Maliqi, që të dy nga Vushtrria, ku si pasojë e lëndimeve të marra të njëjtit janë duke u kuruar në QKUK thuhet në aktvendimin e prokurorit Arben Kadriu.

Nga dhuna që u shkaktua në ndeshjen Drita – Llamkos deri më tashti janë arrestuar dhe ndodhen në procedura hetuese e gjyqësore 7 veta derisa dyshohet dhe pritet arrestimi edhe i 20 të tjerëve thonë burimet tona. /rajonipress.