Nga Kosova po ikin edhe të punësuarit

Largimi masiv i kosovarëve drejt vendeve të Bashkimit Evropian (BE), po bëhet edhe nga ata të cilët e kanë një vend pune e që marrin një pagë mujore – mbi mesataren e zakonshme në Kosovë.

Kosovën kanë filluar ta braktisin edhe njerëzit të cilët punojnë nëpër media. Telegrafi mëson se nga Kosova tashmë janë larguar tre kameramanë të televizioneve kosovare.

Rrugën e largimit e kanë ndjekur edhe dy punonjës te hoteleve me emër në kryeqytet, ku ata siguronin paga të kënaqshme në vendin e tyre të punës.

Fatin e largimi të punëtorëve nga vend i punës, në drejtim të shteteve të BE-së, e kanë edhe kompani të mëdha në vendin tonë.

Rrjetit të qendrave tregtare ETC i janë larguar deri më tani disa punëtorë. Kjo e ka brengosur edhe njërin prej biznesmenëve më të mëdhenj në vend, Ramiz Kelmendin.

“Po, ka ikje. Më e keqja është që po na ikin profesionistët. Po na ikin ata me zanate, me përvojë pune. Na duhet kohë t’i krijojmë ata”, ka deklaruar Kelmendi për Gazetën Fjala.

Me pasoja edhe më të mëdha po ballafaqohet ndërmarrja Europlast. Kësaj i kanë ikur deri tash gjashtë punëtorë.

“Se kanë lënë për rroga. Ato i kanë marrë me rregull që nga viti 2006”, ka theksuar pronari i kësaj ndërmarrje, Ragip Berisha.

Nga kjo ikje janë prekur edhe kompani të fuqishme nga qyteti i Vushtrrisë, nga të cilat Telegrafi mëson së janë larguar edhe dhjetëra punëtorë. /Telegrafi/