Arilena Ara është një nga këngëtaret e reja në moshë e cila ka korrur një sukses të madh që në hapat e parë të karrierës së saj.
Së fundmi ajo përpos këngës po e sfidon veten edhe në fushën e moderimit. Këngëtarja bashkëprezanton krah Florjan Binajt emisionin më të ri “Piranjat”. Si e ftuara speciale në spektaklin e modës “Star Show”, ajo ndau me të gjithë çelësin e suksesit. Ara tregoi se sipas saj të bësh disa gjëra mirë arrihet vetëm duke i balancuar ato.
“Jam ndier jashtëzakonisht mirë. Në fakt thyeva akullin, nuk mendoja se do të ishte aq e thjeshtë, megjithatë tani jam mësuar dhe kam lënë muzikën pak në vend të dytë, gjë që ka filluar të më shqetësojë, por është një eksperiencë e bukur.
Mos e beso, sapo gënjeva publikisht- vijoi me shaka Arilena. Unë ja dal duke balancuar çdo gjë me kujdes dhe duke u kujdesur për këtë gjë posaçërisht Popi, që është partneri im i një jete, në gjithçka që bëj në karrierë, në muzikë dhe padiskutim familje,”-u shpreh Arilena.
Më herët e ftuar në programin “A Live Night”, këngëtarja ka folur rreth jetës së saj profesionale dhe personale. Arilena ka treguar plot nostalgji një histori të fëmijërisë së saj dhe kohët me babain e ndjerë.
“Kam patur një lidhje të jashtëzakonshme me babain tim, ai zbuloi talentin tim për muzikën. Lidhja ime me të ka qenë e jashtëzakonshme, më merrte çdo pasdite dhe dilnim bashkë në qytet. Më tregonte sekrete që nuk i ka ndarë me askënd të familjes. Të jesh fëmijë e të konsiderojë si të rritur, të bën të kesh siguri. Lutesha çdo natë për familjen dhe të afërmit. Kisha një gjendje ekonomike të thjeshtë, më modeste se të thjeshtë, por lumturia dhe lidhja që ne kishim ishte shumë e bukur e shumë spontane. Tregonim çdo gjë njëri tjetrit.”– rrëfeu ajo.
